«Osy jyly qor ambýlatorııalyq-emhanalyq deńgeıdegi medısınalyq qyzmetterdiń qoljetimdiligin keńeıtip, kúndizgi stasıonar qyzmetin qarjylandyrý kólemin kóbeıtti. Birshama qarjy pandemııa jaǵdaıyn jáne sıfrlandyrý múmkindikterin eskere otyryp, qashyqtyqtan kórsetiletin medısınalyq qyzmetterdi odan ári engizýge jumsalýda», dedi ol onlaın brıfıng barysynda.
Nurlybek Qabdyqaparovtyń aıtýynsha, Nur-Sultan qalasy boıynsha 2021 jyldyń 9 aıynda koronavırýstyq ınfeksııamen kúres aıasyndaǵy is-sharalardy qarjylandyrý 35,38 mlrd teńgeni qurady. Onyń ishinde: medısına qyzmetkerlerine ústemeaqylar – 17,38 mlrd teńge; medısınalyq kómekke jáne KVI taralýyn boldyrmaý jónindegi qyzmetterge – 13,75 mlrd teńge jumsaldy.
Karantındik jáne ınfeksııalyq stasıonarlarǵa 42,7 myńnan astam adam emdeýge jatqyzyldy jáne emdeldi. KVI taralýyn boldyrmaý úshin stasıonar aıasynda úıge kep kórsetiletin medısınalyq kómekke 1,88 mln teńge jumsalyp, 60 adam emdeldi. PTR dıagnostıka qyzmetine 3,41 mlrd teńge bólinip, 482,1 myń PTR-test jasaldy. Mobıldi brıgadalardyń shyǵýyna 838,73 mln teńge ketti. Olar 145,5 myń shaqyrtýǵa shyqty.
«Elorda turǵyndary koronavırýstyq ınfeksııa jáne pnevmonııa kezinde medısınalyq kómekti medısınalyq saqtandyrý júıesindegi mártebesine qaramastan tegin alady. Koronavırýstyq ınfeksııamen nemese ortasha, aýyr jáne asa aýyr deńgeıdegi pnevmonııamen aýyrǵan pasıentter Medısınalyq saqtandyrý qorynyń qarajaty esebinen ońaltýdan óte alady. Azamattar úıinde emdeldi me, álde aýrýhanada emdeldi me, oǵan qaramaıdy. Medısınalyq ońaltýǵa joldama reabılıtolog mamannyń qatysýymen aýrýhananyń nemese emhananyń mýltıdıssıplınarlyq komandasynyń qorytyndysy boıynsha beriledi», dedi fılıal dırektory.
