Sapar sheńberinde delegattar «J. A. Woll Handels GmbH», «EOS GmbH», «Gigaset AG», «Svevind Group», «Schaeffler AG» sııaqty iri kompanııalardyń basshylarymen kelissózder júrgizdi, onda AKT, energetıka, saýda, mashına jasaý jáne t.b. salalardaǵy áleýetti jobalardy iske asyrý máseleleri talqylandy.
Osylaısha, Germanııanyń jetekshi saýda jelileriniń birimen «J. A. Woll Handels GmbH» kezdesýde kásiporynnyń Qazaqstanda óndiristi uıymdastyrýǵa qatysý múmkindigi qarastyryldy. «EOS GmbH» basshylyǵymen kelissózder barysynda kompanııa Germanııa ortalyqtaryna uqsas Qazaqstan aýmaǵynda ınnovasııalyq ortalyq jáne oqý kýrstaryn ashýǵa múddeliligi týraly málimdedi.
«Svevind Group» nemis kompanııasynyń prezıdenti Volfgang Kroppen kezdesýde taraptar Qazaqstanda «jasyl» sýtegi óndirisi boıynsha jobany iske asyrý sheńberinde Úkimet tarapynan memlekettik qoldaý kórsetý máselelerine erekshe nazar aýdardy. Bıylǵy 13 qyrkúıekte kompanııanyń el Prezıdenti Q.Toqaevpen eki jaqty kezdesýi ótti, al 6 qazanda qazaqstandyq delegasııanyń Shvesııaǵa sapary barysynda «Svevind Group» kompanııasymen 2031 jylǵa deıingi jobany iske asyrý boıynsha Jol kartasyna qol qoıyldy.
Sonymen qatar sapar aıasynda álemniń jetekshi mashına jasaý kompanııalarynyń biri «Schaeffler AG» alańynda Premer-Mınıstrdiń orynbasary R.Sklıardyń tóraǵalyǵymen iskerlik toptardyń, sondaı-aq eki eldiń bıznes-qoǵamdastyqtarynyń 70-ke jýyq ókiliniń qatysýymen «Mashına jasaýdaǵy jańa tehnologııalar-sıfrlandyrý ósý draıveri retinde» taqyrybynda dóńgelek ústel uıymdastyryldy.
Is-sharany ashqan Premer-Mınıstrdiń orynbasary R.Sklıar mashına jasaý salasyn qosa alǵanda, ekonomıkanyń túrli salasynda Qazaqstanmen ózara tıimdi yntymaqtastyqty nyǵaıtýdaǵy german bıznesiniń mańyzdy rólin atap ótti.
«Bizdiń elderimiz arasynda barlyq deńgeıde ónerkásiptik, saýda-ekonomıkalyq, tehnologııalyq jáne basqa da salalarda birlesken jumys júrip jatyr. Tabysty yntymaqtastyqtyń jarqyn mysaldarynyń biri – CLAAS kompanııasymen birlesip júzege asyrylatyn Soltústik Qazaqstan oblysynda aýyl sharýashylyǵy tehnıkasyn óndirý boıynsha joba. Bul – nemis ınvestorlarynyń Qazaqstandaǵy qyzmetin damytýǵa degen joǵary seniminiń taǵy bir dáleli», dedi R.Sklıar.
Sondaı-aq «Schaeffler AG» prezıdenti Klaýs Rozenfeld óziniń quttyqtaý sózinde Germanııanyń Qazaqstanmen ınvestısııalyq yntymaqtastyǵynyń áleýetin joǵary baǵalap, kompanııa Qazaqstannyń ónerkásipti jańǵyrtýdaǵy áriptesi bolýǵa daıyn ekenin atap ótti.
«Germanııa – álemdegi mashına jasaý salasyndaǵy kóshbasshylardyń biri. Biz úshin ınnovasııalyq tehnologııalar transferti, mashına jasaýda birlesken óndirister qurý óte mańyzdy, Biz sondaı-aq Germanııa ınvestorlaryn Qazaqstanǵa shaqyramyz», dedi Qazaqstan mashına jasaýshylar odaǵynyń basqarma tóraǵasy Meıram Pishembaev. Sondaı-aq kezdesý barysynda M.Pishembaev munaı-gaz, mashına jasaý, taý-ken metallýrgııalyq, agroónerkásiptik keshenge arnalǵan mashına jasaý, jańartylatyn energııa kózderi sııaqty sektorlar boıynsha ónerkásiptik kooperasııa men birlesken yntymaqtastyqtyń perspektıvalary týraly aıtyp berdi.
Sonymen qatar «KAZAKH INVEST» UK» AQ basqarma tóraǵasy Meıirjan Iýsýpov Qazaqstannyń ınvestısııalyq áleýeti, sondaı-aq ınvestısııalar tartýdyń memlekettik júıesinde qoldanylatyn jeńildikter jáne Qazaqstandaǵy sheteldik bıznestiń jumysy úshin qolaıly ahýal týǵyzatyn basqa da quraldar týraly baıandama jasady. «Búginde Qazaqstan ekonomıkany ártaraptandyrýǵa jáne bıznes pen ınvestısııa úshin qolaıly jaǵdaı jasaýǵa baǵyttalǵan keń aýqymdy reformalar júrgizýde. Osylaısha, bizdiń elderimiz arasyndaǵy ekijaqty qatynastar men ınvestısııalyq yntymaqtastyqty nyǵaıtý týraly aıta otyryp, el basshylyǵy Germanııaǵa erekshe nazar aýdaratynyn atap ótken jón. Bolashaqta osyndaı qoldaý arqyly birlesken ınvestısııalyq jobalardy iske asyra bastaımyz dep úmittenemin. Biz Germanııamen qarym-qatynasymyzdy nyǵaıtý úshin birtindep qadamdar jasap jatyrmyz. Aıta ketý kerek, Qazaqstandy óz ınvestısııalarynyń mejeli orny retinde qarastyratyn birneshe germanııalyq kompanııalar bar», dedi M.Iýsýpov.
Budan basqa, is-shara aıasynda «KAZAKH INVEST» UK» AQ jáne German ekonomıkasy shyǵys komıtetiniń qatysýymen ınvestısııalyq jobalar jónindegi úılestirý komıtetiniń 1-shi otyrysy uıymdastyryldy. Onda Qazaqstan Prezıdenti Q.Toqaevtyń 2019 jyly GFR-ǵa resmı sapary barysynda qol qoıylǵan birlesken josparǵa sáıkes ınvestısııalyq jobalar men ýaǵdalastyqtardy iske asyrý sheńberindegi birlesken jumystyń aralyq qorytyndylary shyǵaryldy.
Otyrys barysynda R.Sklıar búgingi tańda birlesken jobalardy júzege asyrýda belgili bir jetistikterge qol jetkizilgenin atap ótti. Sondaı-aq ındýstrııalandyrý jáne ınvestısııalar salasyndaǵy úılestirý komıtetiniń jumys isteýi Qazaqstan men Germanııa arasyndaǵy iskerlik baılanystardy keńeıtýge jáne ózara tıimdi yntymaqtastyqty nyǵaıtýǵa jańa serpin men qomaqty úles qosatyny atap ótildi.
О́z kezeginde German ekonomıkasy Shyǵys komıtetiniń atqarýshy dırektory Mıhael Harms eki el arasyndaǵy saýda-ekonomıkalyq jáne dostyq baılanystardy nyǵaıtý maqsatynda Shyǵys komıteti qazaqstandyq tarappen birlesken jobalardy iske asyrý boıynsha odan ári jumys isteý úshin bar kúshin salatynyn málimdedi. Otyrys sheńberinde Komıtet birlesken jobalardyń tizbesin bekitti, sondaı-aq birlesken jobalardy iske asyrý monıtorınginiń nátıjeleri boıynsha otyrystar ótkizý ýaǵdalastyqqa qol jetkizildi.
Aıta ketý kerek, qazaqstandyq delegasııanyń Germanııaǵa sapary barysynda «adidas AG» jáne «PUMA SE» kompanııalarynyń basshylyǵymen kezdesýler jáne óndiristik alańdardy aralaý uıymdastyryldy.
