Buqaralyq aqparat quraldarynyń birinde Almatydaǵy №85 orta mektep oqýshysy dene shynyqtyrý sabaǵynan keıin aýrýhanaǵa túskeni, balanyń anasy muǵalimdi urdy dep aıyptaǵany týraly aqparat tarady. Atalǵan bilim mekemesiniń dırektory Nınel Erkebaeva oqıǵaǵa qatysty pikir bildirip, ustaz jaıly aıtyp berdi.
«Taraǵan aqparattyń vıdeosy bar. Ol jerde eshqandaı qol kóterý joq. Biraq oqýshynyń anasy onyń qatty taıaq jegenin jáne mıy shaıqalǵanyn aıtady. Bala qazir aýrýhanada. Bizdiń sport zalda beınebaqylaý ornatylǵan, osy beınejazba arqyly muǵalimniń oqýshyny urmaǵanyn dáleldep otyrmyz», deıdi mektep dırektory.
Dırektor dúısenbi kúni muǵalimniń óz erkimen jumystan ketkenin aıtty.
«Dene shynyqtyrý pániniń muǵalimi bizde 21 jyl jumys istedi, gandbol seksııasynyń jetekshisi boldy. Onyń jetekshiligimen qyzdarymyz gandboldan respýblıkalyq jarystarda birneshe ret birinshi oryndy ıelense, byltyr úshinshi oryn aldy. Qazir bizde dene shynyqtyrý pániniń alty muǵalimi bar», dedi Nınel Erkebaeva.
Qalalyq bilim berý basqarmasy tekserý júrgizilip jatqanyn málim etti.
«Bilim basqarmasynda tekserý komıssııasy quryldy. Qazir jaǵdaıdy anyqtap jatyr. Onyń nátıjeleri boıynsha tıisti sharalary qabyldanatyn bolady. Nátıjeleri týraly tekserý aıaqtalǵannan keıin qosymsha habarlaıtyn bolamyz», dep jaýap berdi bilim basqarmasynan.
