Uıym basshysynyń aıtýynsha, pandemııanyń beti qaıtpaýyna negizinen onymen kúres quraldaryna qoljetimdilik árkelki bolǵany sebepshi bolyp otyr. Bul muqtajdyq úshin DDU-ǵa 23 mlrd dollardan astam qarajat qajet.
«Búginde biz COVID-19 vırýsymen kúres júrgizýdi josparlaý úshin jańa bıýdjetti jarııalap otyrmyz. Elderge vırýspen kúres júrgizý jolynda úlken maqsattarǵa qol jetkizip, qajetti quraldar usyný úshin aldaǵy 12 aıda 23,4 mlrd dollar qarajat kerek. Bul bastamany tolyq qarjylandyrý – DDU strategııasynyń, daıarlyq jáne eleý josparynyń, pandemııany baqylaýǵa alý boıynsha bárin qamtıtyn josparymyzdyń mańyzdy bóligi», dep atap ótti T.Gebreıesýs.
Keıingi eki aıda qaýipti ınfeksııaǵa shaldyqqandar men qaıtys bolǵandar sany birshama artqan. Uıym basshysy Tedros Gebreıesýstyń aıtýynsha, ınfeksııamen kúres quraldary áli kúnge deıin ádil bólinbeı keledi. Sonyń saldarynan indetti jeńý múmkin bolmaı tur. Búginde álemde 245 mıllıondaı adam kovıd juqtyrǵan. 5 mıllıonǵa jýyǵy qaıtys boldy.
Uıymnyń Eýropalyq bıýrosynyń basshysy Gans Klıýge byltyrǵy shekteýlerden mıllıondaǵan bala psıhıkalyq jáne áleýmettik turǵydan zııan shekkenin aıtady. Ol bıylǵy qysta ótken qatelikterdi qaıtalamaýymyz kerek dep qazirden eskertip jatyr. Dúnıejúzilik densaýlyq saqtaý uıymy indet qatty taralǵannyń ózinde mektepterdi japqannyń ornyna, araqashyqtyq ustaný, qoldy jıi jýý, maska taǵý, synyptardy jeldetý sııaqty sanıtarlyq talaptardy saqtaý anaǵurlym paıdaly dep esepteıdi.
