Baǵý merzimi aıaqtalǵanymen uqypty sharýa aýa raıy jaıly bolsa jaıylymyn erte jep qoımas úshin malyn endi erkin jaıylymǵa jiberedi. Mundaıǵa ásirese bıylǵy kúz qolaıly bolyp tur. Qarasha týyp qalǵanymen kún áli qońyrjaı, jer áli qatqan joq. Jazdyń jartysynan asyp baryp jaýǵan jaýyn-shashyn da maldyń otyn da ábden jetildirgen. Qazir ormannyń qoınaýlary túgil ashyq dalanyń shóbi tunyp tur. Mundaıda soltústiktik sharýa «dalanyń oty tunyp turǵan qyzyl ińirden maldy qalaı qoraǵa qamap otyraıyn» dep sóıleıdi. Alaıda ol bos júrgen maldyń kóbinese qoldy bolatynyn oılamaıdy. Onyń ústine mundaı mal jol-kólik oqıǵasynyń týýyna da sebep bolady. Ásirese aýa raıynyń jaýyndy, jol kórinisi anyq bolmaıtyn túngi mezgilde, tumandy kúnderi aýyr saldarǵa soqtyrady. Ondaı oqıǵalar jıi bolyp turady. Osyndaı keleńsizdikterdiń aldyn alý úshin oblystyq Polısııa departamenti «Erkin jaıylym» atty jedel-profılaktıkalyq shara ótkizdi. Onyń barysynda aldyn alý is-sharasyn uıymdastyrýshylar aýyl ákiminiń qatysýymen jergilikti turǵyndarmen kezdesip, qaraýsyz bos júrgen maldyń qoldy bolatynyn nemese jol-kólik oqıǵasyna sebep bolatynyn túsindirip, soǵan baılanysty jaýapkershilik júkteletinin eskertti.
Mamlıýt aýdanyndaǵy osyndaı sharaǵa aýdandyq prokýratýra ókilderi de qatysty. «Osy is-sharanyń eki kúninde maldyń qaraýsyz bos jaıylýynyń 17 faktisi anyqtaldy. Ieleri anyqtalǵanǵa deıin qaraýsyz jaıylǵan 42 bas iri qara arnaıy qashalarǵa qamaldy», deıdi aýdandyq PB bastyǵy, polısııa polkovnıgi Pıotr Klımov.
Qazir polısııa qyzmetkerleri jedel-profılaktıkalyq jumysty oblystyń barlyq aýdandarynda júrgizýde. Jyl basynan beri oblysta tirkelgen 31 mal urlyǵynyń 22-si qaraýsyz qaldyrǵandyqtan oryn alǵan. Sondaı-aq 7 jaǵdaıda qaskóıler maldy qoradan, 2 jaǵdaıda ashyq qashadan urlaǵan. Ázirshe eki mal urlyǵy ashylmaǵan, qalǵan 29 anyqtaldy. Onyń 24 is boıynsha óndiris aıaqtaldy, al qalǵandary boıynsha tergeý amaldary júrgizilýde.
Soltústik Qazaqstan oblysy
