Belgradtaǵy álem chempıonatynyń asa jeńil salmaǵynda el namysyn qorǵap jatqan Temirtas Júsipov otandastarymyz arasynda birinshi bolyp qurlyq birinshiliginiń shırek fınalyna joldama aldy. Sondaı-aq Temirtas birinshilikke qatysyp jatqan chempıonattaǵy eń jasy úlken boksshylardyń biri sanalady. 48 kg-da Qazaqstannyń bes dúrkin chempıony, 2013 jylǵy Azııa chempıony, jýyrda ǵana Reseıde ótken áskerıler arasyndaǵy jahandyq dodanyń jeńimpazy Júsipov Serbııa sharshy alańyndaǵy birinshi kezdesýin jarys qojaıyny, 19 jastaǵy Omer Ametovıchpen ótkizdi. О́zinen 14 jas kishi boksshymen judyryqtasqan Temirtas 4:1 esebimen esh qıyndyqsyz kelesi kezeńge ótti.
Otandasymyz jartylaı fınalǵa shyǵý úshin О́zbekstannyń úkili úmiti – Nodırjon Mırzahmedovpen qolǵap túıistiredi. Bul – osy chempıonattaǵy qazaq-ózbek teketiresiniń tórtinshisi (Sáken Bıbosynov – Hasanboı Dýsmatov; Aslanbek Shymbergenov – Shahram Gııasov; Aıbek Oralbaı – Madııar Saıdrahımov) bolmaq. Azııa chempıonatynyń eki dúrkin jeńimpazy ózbek Mırzahmedov pen Temirtas Júsipov sońǵy ret osy jyldyń sáýir aıynda Reseıdiń Sankt-Peterbýrg qalasynda ótken Gýbernator kýbogynyń fınalynda kezdesip, báseke Nodırjonnyń jeńisimen aıaqtalǵan bolatyn. Mine, araǵa sanaýly aılar salyp eki boksshynyń joly álem chempıonatynyń shırek fınalynda qaıta túıisti. Sondaı-aq bul – Temirtas úshin ese qaıtaratyn tamasha múmkindik. Eki boksshy arasyndaǵy kezdesý 2 qarashaǵa josparlanǵan.
Sondaı-aq chempıonattaǵy alǵashqy jekpe-jekterin ótkizgen Sabyrhan Mahmud (54 kg), Samatáli Tóltaev (60 kg), Sanatáli Tóltaev (63,5 kg), Nurbek Oralbaı (80 kg) jáne Aıbek Oralbaı (92 kg) da birinshilikti sátti bastady. Byltyr 52 kg salmaqta el chempıony atanǵan Sabyrhan álem chempıonatyndaǵy alǵashqy kezdesýin ońtústikkoreıalyq Kım In Gıýmen ótkizip, 5:0 esebimen basym tústi.
Al aǵaıyndy Tóltaevtardyń úlkeni Samatáli (60 kg) taılandtyq Hýnatıp Pıdýnchti 3:2 esebimen tize búktirse, Sanatáli (63,5 kg) moldovalyq Vasılıı Chebotardy 5:0 esebimen jeńdi.
Sonymen qatar aǵaıyndy Oralbaılar da alǵashqy jeńisterine qol jetkizdi. 92 kg-da óner kórsetetin Aıbek polıak boksshysy Mateýsh Bereznıskııden 4:1 esebimen basym tússe, Nurbek brazılııalyq Isaıasa Fılony eline qaıtardy. Qorytyndy esep – 5:0.
Álem birinshiligindegi ekinshi jekpe-jegin ótkizgen Aslanbek Shymbergenov (71 kg) Rıo Olımpıadasynyń fınalısi ózbekstandyq Shahram Gııasovty aıqyn basymdyqpen jeńip (5:0!), týrnırdiń kelesi aınalymyna joldama aldy. 75 kg salmaq dárejesinde judyryqtasyp jatqan Nurqanat Raıys ta óz myqtylyǵyn dáleldeýde. 21 jastaǵy otandasymyz ekinshi aınalymda moldovalyq Vlad Gavrılıýkpen kezdesip, tóreshilerdiń sheshimi boıynsha 4:1 esebimen jeńiske jetti.
Ulttyq qurama kapıtany, eki álem chempıonatynyń qola júldegeri Abylaıhan Júsipov (67 kg) jankúıerlerge «Mashına» laqap atymen tanymal Venesýela ókili Krıstıan Palasıony jarys jolynan yǵystyrdy. Al 57 kg-da judyryqtasatyn Serik Temirjanov jýyrda ǵana Polshada ótken jastar arasyndaǵy álem chempıonatynda top jarǵan japonııalyq Reıto Sýsýmıden basym tústi. Bul jekpe-jekte Sýsýmı jerlesimizge esh qarsylyq kórsete almady. Qaıta Temirjan japonııalyq boksshyǵa shaǵyn sheberlik sabaǵyn ótkizdi dese de bolady.
О́kinishke qaraı, álem chempıonatynyń kezekti jarys kúninde ekinshi boksshymyz birinshilikten shyǵyp qaldy. Eki álem chempıonatynyń kúmis júldegeri, Tokıo Olımpıadasynyń qola júldegeri Qamshybek Qońqabaevtyń izbasary sanalǵan asa aýyr salmaqtaǵy Nurlan Saparbaı alǵashqy jekpe-jeginde ıspanııalyq Aıýba Gadfy Drısstiń osal tusyn taba almady. Jerlesimiz tóreshilerdiń aralas sheshimi boıynsha qarsylasynan jeńilip qaldy. Osylaısha, chempıonattyń alǵashqy aptasynda eki boksshymyz álem chempıonatyn erte aıaqtady.
Degenmen jeksenbi kúngi jaǵdaı boıynsha Qazaqstan quramasynyń 11 boksshysy jarys jolyn jalǵastyrýda. Bul – ázirshe, chempıonattaǵy eń úzdik nátıje.
