Osylaısha, Chempıondar lıgasynyń irikteý kezeńine 18 ret qatysyp, rekord ornatqan «Qaırat» bıyl da atalǵan týrnırdiń negizgi kezeńinde oınaýǵa múmkindik aldy. Toptyq týrnırdiń birinshi oıynynda Chehııanyń «Plzen» ujymymen 3:3 esebimen teń oınaǵan «Qaırat» ekinshi týrda Reseıdiń «Tıýmen» klýbymen sheberlik baıqasty. Kezdesýde 1:3 esebimen jeńilip jatqan jerlesterimiz matchtyń sońǵy mınýttarynda tarazy basyn teńestirip, jeńilisten aman qaldy. Sóıtip almatylyq klýb ekinshi kezdesýinde de 3:3 nátıjesimen teń tústi. «Tıýmenmen» ótken oıynda Kaka shákirtterinen Dáýren Tursaǵulov, Edson men Vıtao mergendigimen kózge túskenin aıta keteıik.
Al sońǵy sheshýshi kezdesýde «Qaırat» Italııanyń «Pezaro» komandasymen kezdesti. Oıynnyń esebin kezdesýdiń 7-mınýtynda Italııa klýbynyń ókili Felıpe Tonıdandel ashty. Arada 10-mınýt ótkende Dáýren Tursaǵulov bir golmen jaýap qaıyrsa, 27-mınýtta ekinshi márte qaqpany dál kózdep, dýbl avtory atandy. Al 34-mınýtta ıtalııalyq klýbtan Adolfo Salas mergendik tanytyp, tarazy basyn teńestirdi. Biraq ıtalııalyq jankúıerlerdiń qýanyshy uzaqqa sozylmady. Kóp ýaqyt ótpeı «Qaırat» oıynshysy Dıego Favero qaıtadan komandasyn alǵa shyǵardy. Match aıaqtalǵansha tablodaǵy osy esep saqtalyp, «Qaırat» 3:2 esebimen jeńiske jetti. Almatylyq ujym aldyńǵy eki oıynda eki upaı ıelengenine qaramastan, sońǵy matchtaǵy jeńisiniń arqasynda óz tobynda birinshi oryn aldy. Ekinshi jáne úshinshi oryndarǵa jaıǵasqan «Plzen» (Chehııa) jáne «Tıýmen» (Reseı) klýbtary da jarystyń kelesi satysyna shyqty.
Al ekinshi topta synǵa túsken qazaqstandyq «Atyraý» klýby úsh oıynnyń úsheýinde de jeńilip, Chempıondar lıgasynyń Elıtaly kezeńine shyǵa almady. Birinshi oıynda Slovenııanyń «Dobovesinen» 1:2 esebimen jeńilgen jerlesterimiz keıingi eki matchta iri eseppen utyldy. Ekinshi týrda atalǵan týrnırdiń qazirgi chempıony – Portýgalııanyń «Sportıng» klýbyna 1:8 esebimen jol berse, sońǵy týrda Fransııanyń «Aner Vılnev 92» komandasynan 0:6 esebimen utyldy.
Aıta keteıik, Elıtaly kezeńniń jerebe tartý rásimi
3 qarashada ótedi.
