OTAN QORǴAÝ OTBASYNAN BASTALADY

Nursultan NAZARBAEV: Ústimizdegi jyly biz Uly Otan soǵysyndaǵy Jeńistiń 65 jyldyǵyn atap ótemiz. Bul bizdiń ortaq tarıhymyzdaǵy mańyzdy data. (Qazaqstan halqyna Joldaýynan). Memleket basshysy – Qarýly Kúshterdiń Joǵarǵy Bas qolbasshysy Nursultan Nazarbaev keshe Otan qorǵaýshylar kúni men Uly Jeńistiń 65 jyldyǵy qarsańynda Ilınka kentindegi áskerı qalashyq pen astanalyq №44813 áskerı bólimde boldy. Osyndaǵy kottedj úlgisinde salynǵan turǵyn úı kesheni ornalasqan áskerı qala­shyq aldy abyr-sabyr. Sapqa turǵyzylǵan áskerıler, oınaǵan orkestr Elbasyn laıyq­ty qarsy alý úshin daıyndyq ústinde. Áske­rı­lerdiń júzderindegi erekshe jylylyq olar­dyń elge, Elbasyna degen rııasyz kóńil­derin pash etip turǵandaı. Kireberis qaq­pa­nyń mańdaıshasyna “Prezıdentimizge, hal­qy­myzǵa myń da bir rahmet!” dep jazy­lyp­ty. Elbasy – Joǵarǵy Bas qolbasshy kelgen kezde áskerı orkestr oınap, áskerı sap tik túzelip turdy. Aldymen Nursultan Ábishuly áskerı qalashyqtyń jobasymen tanysyp, áskerı qyzmetshiler otbasylarynyń ornalasýyn su­rap bildi. Sodan keıin áskerı qyzmet­shi­lerge turǵyn úılerdiń kiltterin saltanatty jaǵdaıda tabys etti. Barlyq kottedj ishin­ara jıhazdarmen qamtamasyz etilgen, kólik qoıatyn orny bar aýlasy 10 sotyq alańdy quraıdy. Áskerılerdiń aldy  jeltoqsan aıynan bastap osynda qonystanypty. Sol ýa­qyttan beri paıdalanýǵa jan-jaqty ázir­lengen 11 baspana kilti kásibı merekege  oraı ıelerin tapty. Sondaı qýanysh ıele­riniń biri Áskerı-áýe kúshteriniń polkovnıgi Serik Ábdiraıymov buqaralyq aqparat quraldary ókilderine bylaı dedi: “Sońǵy kezderi ushaqtarymyz ben tikushaqtarymyz kúrdeli jóndeýlerden ótip, ushý saǵattary arta bastady. Uly Jeńistiń 65 jyldyǵy qar­sańynda jáne Otan qorǵaýshylar mere­ke­sine oraı páterge ıe bolyp, úlken qýa­nysh­qa kenelip turmyz. Munyń barlyǵy Elbasynyń, elimizdiń Otan qorǵaýshylarǵa degen úlken qamqorlyǵynyń arqasy dep túsinemiz”. Aýmaǵy 40 gektardy quraıtyn qalashyq­ta 200 kottedj bolsa, sonyń 129-y Qor­ǵa­nys mınıstrligine bólinipti. Taǵy bir belgili bolǵanyndaı, aýmaǵy 10 gektar telimge ákim­shilik korpýsy, jataqhanasy, ashanasy jáne turmysqa qajettiniń barlyǵy bar keshen salý kózdelip otyr eken. Bir nemese eki áske­rı otbasyna arnalǵan kottedjder 176 áskerı otbasyna eseptelinipti. Ázirge 88  áskerı otbasy baspanalaryna kirip úlgergen kórinedi. Endi qalǵany shilde aıyna deıin, ıaǵnı jóndeý jumystary bitken soń qonys­tanady dep kútilýde eken. Jalpy, turǵyn úıler úsh jáne odan da kóp balasy bar áskerı qyzmetshilerge be­ril­geni málim boldy. Munda qystap shyqqan tur­ǵyndar qaqaǵan aıazda da óz baspana­lary­nyń jyly bolǵandyǵyn aıtyp jatty. Turǵyn úı ázirge avtonomdy pesh arqyly jylytylady. Shaǵyn da ońtaıly peshke otyn retinde kómir paıdalanylady eken. Bolashaqta áskerı qalashyq Astananyń ortalyqtanǵan jylý júıesine qosylady dep josparlanypty. Jalpy, Elbasy Qarýly Kúshterdiń damýyna jáne áskerı qyzmetshilerdiń turmystyq jaǵdaıyna únemi erekshe nazar aýdaryp keledi. Jaqyn mańdaǵy bir-eki kottedjdiń ishine arnaıy kirip, ondaǵy áskerılerdiń turmys-jaǵdaıymen jaqyn tanysýǵa yqylas tanytýynyń ózi osy sózimizdiń dáleli bolsa kerek. Budan keıin Memleket basshysy – Qa­rý­ly Kúshterdiń Joǵarǵy Bas qolbasshysy Nursultan Nazarbaev, joǵaryda atap kór­setilgenindeı, elordanyń áýe qorǵanysyn qamtamasyz etetin  №44813 áskerı bólimine atbasyn burdy. Bul – Jeńistiń 65 jyldyǵy men Otan qor­ǵaýshylar  kúni qarsańyna oraılasty­ryl­ǵandyqtan, Elbasy birinshi kezekte atal­ǵan áskerı bólimniń jaýyngerlik daıyn­dyǵynyń deńgeıimen tanysty. Máselen, №44813 áskerı bóliminde Nursultan Ábishuly zenıttik-zymyrandyq dıvızıonnyń shartty áýe nysanyn joıý úderisterin tamashalady. Qarýly Kúshterdiń Áýe qorǵanysy kúshteri bas qolbasshysynyń orynbasary, general-maıor Oqas Saparov elordanyń áýe kúshteri qorǵanys júıesiniń artyqshylyǵy men ereksheligi jóninde aıtty. Ol, sondaı-aq, áskerı bólimdegi zenıttik-zymyrandyq dıvızıonnyń shartty áýe nysanyn joıý is-qımyldaryna qatysty jan-jaqty málimet berdi. Al Qarýly Kúshterdiń Áýe qorǵanysy kúshteriniń bas qolbasshysy, general-maıor Aleksandr Sorokın elordanyń áýe qor­ǵa­ny­syn qamtamasyz etetin zenıttik-zymy­ran­dyq keshenniń tájirıbelik turǵydaǵy is-qımyly jóninde áńgimeledi. Sonymen qatar, Elbasyna áýe qarsy­la­synyń túrli deńgeıdegi soqqysyna toıtarys beretin kópmaqsattaǵy zymyrandy keshen jaýyngerlik esep tobynyń is-qımyldary da jan-jaqty tanystyryldy. Memleket basshysy – Qarýly Kúsh­ter­diń Joǵarǵy Bas qolbasshysy avıasııanyń arnaıy jaýyngerlik tapsyrmalardan keıingi ushyp kelý sharalaryn baǵalady. Máselen, áýe sherýinde armııalyq avıasııanyń Mı-17 tikushaǵy, ekinshi býyndaǵy qos Sý-27 usha­ǵy, sondaı-aq, eki MıG-31 joıǵysh ushaǵy sap túzedi. Elbasy áýe qorǵaýshylarynyń tájirı­be­lik sabaqtary aıaqtalysymen jaýyn­ger­ler­diń arnaıy tigilgen shatyrly qalashy­ǵyn­da áskerı bólimniń jeke quramymen kezdesip, olardyń tynys-tirshiligimen tanysty, dala ashanasynan dám tatty. Asqar TURAPBAIULY, Láıla EDILQYZY.