«Jastar arasyndaǵy kıkiljiń pyshaqtasýǵa ulasqan. Oqys oqıǵa Aqbulaq yqsham aýdanynda bolǵan», deıdi Almaty qalalyq polısııa departamentiniń baspasóz qyzmeti.
Quzyrly vedomstvanyń málimetinshe, úsh jas jigit kólik ústine shyǵyp, sekirgen.
Kólik qojaıyndary eskertý jasaǵanda, olar pyshaqpen qorqytyp, tóbeles shyǵarǵan.
«Buzaqylardyń birin polıseıler izin sýytpaı ustady. Buryn aýyr qylmys jasaǵany úshin sottalǵan 19 jastaǵy qylmysker mas bolǵan. Ol óziniń qaıda ekenin jáne ne istep júrgenin túsinbegen. Oqıǵa ornyn qaraý kezinde polıseıler úsh pyshaqty taýyp, is materıaldaryna tirkedi», dep habarlaıdy Almaty qalalyq PD baspasóz qyzmeti.
Sondaı-aq týra osy kezde patrýldik brıgadaǵa taǵy bir yqsham aýdanda kólikterdiń ústinde sekirip júrgen buzaqylar týraly habarlama túsken.
«Jastardyń bul oıyn túriniń jaı-japsaryn polısııa qyzmetkerleri tergeý barysynda jan-jaqty saraptaıtyn bolady», deıdi Almaty qalalyq PD baspasóz qyzmeti.
