Atalǵan salymdardyń edáýir úlesi, naqty aıtqanda 305 mlrd dollar – elektr jáne jylý energııasyn óndirýge, 167 mlrd dollar – kólik ınfraqurylymyna, 65 mlrd dollar – taý-ken jáne óńdeý ónerkásibine, sondaı-aq 57 mlrd dollar – turǵyn úı-kommýnaldyq sharýashylyǵyna jáne 49 mlrd dollar aýyl sharýashylyǵyna baǵyttalýy tıis.
Arnaıy baǵalaýǵa sáıkes kómir, munaı jáne gaz óndirý sektoryndaǵy ınvestısııalar uzaqmerzimdi perspektıvada suranystyń tómendeýine baılanysty azaıady dep boljanýda.
«Aıtalyq, qazir Úkimet jańǵyrmaly energııa kózderine ınvestısııalar tartýǵa qatysty jumysty qolǵa aldy. Sonyń biri Qazaqstanda SO2 qaldyǵyn azaıtýǵa arnalǵan iri jobalardy Birikken Arab Ámirlikterimen birlesip iske asyrý kózdelgen. Aıtylǵan kórsetkishter men kómirtekti beıtaraptyqqa qol jetkizý úshin salalyq saıasatty reformalaý qajet. Doktrınada ázirlengen ındıkatorlardy oryndaý úshin ónerkásipte energııa tıimdiligin arttyryp, únemdeý jónindegi sharalar eskerilýi tıis.
«Jasyl» kólikterdiń (ekologııalyq taza kólik túrleri) tıisti ınfraqurylymyn damytý maqsatynda qoldaý tetikterin ázirleý kerek. Termo jańǵyrtý arqyly qoldanystaǵy turǵyn úı qorynda jylýdyń shyǵynyn úshten birge tómendetip, jańa ǵımarattar mindetti túrde jańǵyrmaly qýat kózderine qosylyp, energııa tıimdiliginiń joǵary talabyna saı bolýy qajet. Organıkalyq ónimge degen álemdik suranysty eskerip, ósimdik sharýashylyǵy baǵytynda eginshiliktiń organıkalyq ádisterine kóshýdi jedeldetý arqyly organıkalyq ónimniń eksportyn memlekettik turǵyda qoldaýǵa mán bergen abzal. Elimizdiń kómirteginen beıtarapty damýy ońaı bolmaıdy. Biraq ekonomıkanyń turaqty túrde ilgerileýine negiz bolyp, ınvestısııalyq tartymdylyqty arttyrady», dedi vedomstvo basshysy.
Mınıstr aıtqandaı, ekonomıkany áleýmettik turǵydan transformasııalaý jáne jańa jumys oryndaryn qurý atalǵan doktrınanyń ajyramas bóligi. Budan bólek, elimizdiń bas ekology zııandy qaldyqtyń kólemin azaıtýda orman alqaptaryn ulǵaıtýdyń mańyzy zor ekenin aıtty.
«Elimizde orman qory 30 mln gektardy alyp jatqanymen onyń 13,3 mln gektary ǵana ormandy alqap sanalady. Jas kóshetter SO2-ni birden sińire almaıdy, óıtkeni buǵan shamamen jeti jyl ýaqyt qajet. Osy aralyqta aǵash jetilip, sodan keıin ǵana parnıkti gazdy sińirýge qaýqarly. Kórsetkishterge toqtalsaq, 1 gektardaı orman 3 tonnaǵa deıin SO2-ni sińiredi eken. Bul sonshalyqty kóp emes. Sol sebepti Memleket basshysynyń tapsyrmasyna sáıkes ormandy ulǵaıtýdyń mańyzy zor.
Bul tapsyrma «Jasyl Qazaqstan» ulttyq jobasynda bekitildi. Jyl sońyna deıin 130 mln-ǵa jýyq aǵash otyrǵyzylyp, kóktemde 80 mln-nan astam kóshet egiledi. Kúzde qosymsha 50 mln aǵashty otyrǵyzý kózdelgen. Sondaı-aq Aral teńiziniń qurǵaǵan túbine sekseýil otyrǵyzylyp jatyr», dedi Ekologııa mınıstri.
Sońǵy 10 jylda Araldy qalpyna keltirýge baılanysty halyqaralyq qorlardyń qoldaýymen 85 mln dollardan astam qarajatqa túrli jobalar iske asyrylyp, 340 myń gektarǵa sekseýil otyrǵyzylypty.
