Ádettegideı О́skemen aspanynda án áýeledi, kúı kúmbirledi. Qylqalam sheberleri kózdiń jaýyn alatyndaı kartınalaryn qaz-qatar tizip, qabyrǵaǵa ildi. Áýelde Kýrchatov qalasyn atomshylar men fızıkterdiń qalasyndaı elestetetinbiz. Sóıtsek, otyz jyl ishinde rýhanı ortasy qalyptasqan qalaǵa aınalypty. Kúmis kómeı ánshisi de, dáýlesker kúıshisi de bar. Qara sózden óleń óretin aqynjandy jastar da ósip keledi.
Kýrchatovtyń kórmesine Toılas Qınaıattyń kórkem peızajdary, Tatıana Kırıllovanyń móldiretip jazǵan akvarel jumystary qoıyldy. Sondaı-aq Elena Dementeva men Gımıngýl Adakannyń kestelegen kartınalary da kórermen kóziniń jaýyn aldy. Jalpy alǵanda, kýrchatovtyqtar seksennen astam jumys usynǵan eken.
– Biz jumystyń az ǵana bóligin alyp keldik. Qazirgi ýaqytta Kýrchatovta óner salasy damyp keledi. Osyndaı kórmeler júıeli túrde ótkizilip tursa, ónerpazdardyń shyńdalýyna zor múmkindik, – deıdi Kýrchatov qalasynyń №2 orta mektebiniń kórkem eńbek muǵalimi Áıgerim Tókenova.
«Dala dıdary» baıqaýyna jarmalyqtar tipten erekshe daıyndyqpen kelipti. Mýzeıdiń kireberisine qazaqtyń aqbas buqasynyń músinin qoıyp, kópshilikti tańǵaldyrdy. Nege degende, bul biregeı janýar Jarma aýdanynyń, Shyǵys Qazaqstannyń mal sharýashylyǵy salasynyń teńdessiz brendi desedi.
– Qazaqtyń aqbas sıyry Jarma aýdanynda ósiriledi. Sondyqtan osy músin kórmeniń sımvolyndaı bolsyn dep jasadym, – deıdi sýretshi, músinshi Manat Erkinbekov.
Jalpy, Jarma aýdany festıvalge 50-den astam eksponat ákeldi. Maıly boıaýmen jazylǵan kartınalardyń ishinde Sulýsary aýylynyń sýretshisi Mádı Qaıyrhannyń jumystaryna kópshilik tańdanyp, jyly lebizderin bildirip jatty. Aıta keterligi О́ner mýzeıinde ótip jatqan bul kórme 14 qarashaǵa deıin jalǵasady. Al beıneleý óneri baıqaýynyń jeńimpazdaryn 23 jeltoqsanda «Dala dıdary» festıvaliniń qorytyndy kórmesiniń ashylýynda anyqtalady.
Shyǵys Qazaqstan oblysy
