Onyń qandaı mánisi bar degen saýalymyzǵa atalǵan departamenttiń Azamattyq qorǵanys basqarmasynyń bastyǵy, podpolkovnık Marat Muratov bul mınıstrliktiń buıryǵy boıynsha bolyp jatqan oıyndar ekenin jetkizdi. «Mınıstrlik azamattyq qorǵanystyń kúshteri men quraldarynyń «Baıqońyr» ǵarysh aılaǵynan ushyrylǵan zymyrandardyń qulaý múmkindiginen bolatyn apatty jaǵdaıǵa qarsy is-áreketterge daıyn bolý kerektigi jóninde berilgen buıryǵyna sáıkes osy oıyndar Esil aýdanynda uıymdastyrylyp otyr», dedi ol.
Atalǵan jattyǵý oıyndary 28-29 qazan aralyǵynda ótkizildi. Oǵan 84 adamdyq jeke quram men 43 dana tehnıka qatystyrylyp, «Proton-M» zymyrany qulap, ýly zattardyń jaqyn mańdaǵy Pokrovka aýylyna taralýy múmkin bolǵan jaǵdaıdaǵy áreketter aıqyndalyp, qarsy sharalardyń qandaı bolýy kerektigi pysyqtaldy.
Osy aýylda oblystyq mańyzy bar aýyl sharýashylyǵy kolledji bar edi. Jattyǵý kezindegi evakýasııalyq pýnkt sonyń aýmaǵynda ornalastyryldy. Hımııalyq ýlanǵysh zattarmen jaraqattanýy múmkin adamdar osynda jınalatyn boldy. Evakýasııalanǵandardy qabyldaıtyn komıssııa da osynda ornalastyryldy jáne ýlanǵan adamdarǵa alǵashqy kómek te osynda jasalatyn bolyp belgilendi.
Jattyǵý oıyndarynyń basty maqsaty – tótenshe jaǵdaıdy quryqtaý jumystarynyń tolyqtyǵy men sapasyn anyqtaý, sonymen qatar evakýasııalyq komıssııanyń halyqty der kezinde qulaqtandyryp, qutqarý jumystaryn jedel uıymdastyra alý múmkindigin saraptaý jáne jarylystyń zardaptaryn joıý.
Betin aýlaq qylsyn, zymyrannyń qulaý múmkindigi endi Soltústik Qazaqstannyń da aýmaǵyn qamtýy múmkin ekeni anyqtalǵan. Osyǵan deıin de alty aýdannyń aýmaǵynda osy tárizdes oqý-jattyǵý sharalary ótkizilgen. Oǵan 112 qurylym men 785 adamdyq 250 tehnıkalyq kúsh qatystyrylǵan. Sóıtip, aıdyń-kúnniń amanynda basymyzǵa zymyran qulaýy múmkin ekendigin bilip, oblys halqy alańdaýshylyq bildirip otyr. Qazir bizge eshqandaı paıdasy joq zymyrannyń ushý traektorııasy Soltústik Qazaqstan arqyly ótetin bolypty. Zymyran qulaıtyn bolsa, onyń zardaptary beıbit turǵyndarǵa az bolmasy belgili.
Soltústik Qazaqstan oblysy
