Týrnırge qatysýǵa nıet bildirgen komandalardyń kóp bolǵany sonshalyq, áýeli bir aıǵa jýyq ýaqyt boıy olar irikteý saıystaryna qatysty. Sol synaqtan irkilmeı ótken segiz ujym ǵana fınaldyq básekelerde baq synaý qurmetine ıe boldy. Solardyń arasynan Bostandyq aýdanynda ornalasqan «Orbıta» meshitiniń oıynshylary oza shapty. Quramynda Orazhan Qalnazarov, Dastan Esqoja, Sanat Saǵymbek, Erjan Murat, Álıhan Ahmedov, Bekzat Ábdirasylov sııaqty voleıbolshylar bar komanda buǵan deıin de shashasyna shań juqtyrmaı kelgen edi. Sheshýshi tusta da olar shıraq qımyldap, kózdegen maqsattaryna qol jetkize aldy. Aqtyq saıysta Naýryzbaı aýdanyndaǵy Ibrahım meshiti jamaǵatynan basym túsken «Orbıta» komandasy bas júldeni qanjyǵasyna baılady. Esep – 25:21, 25:21. Úshinshi oryndy Alataý aýdanyndaǵy Nurmúbárak meshiti ıelendi.
– «Asyl mura» baǵdarlamasy aıasynda uıymdastyrǵan osy sporttyq is-sharanyń negizgi maqsaty – meshit jamaǵaty arasynda dene shynyqtyrý men sportty, salamatty ómir saltyn nasıhattaý. Sonymen qatar Islamnyń dástúrli emes aǵymynyń jeteginde júrgen jandarǵa asyl dinniń oń jolyn kórsetý arqyly olardy baýyrǵa tartý, – deıdi Almaty qalasyndaǵy din isteri jónindegi basqarmanyń bólim bastyǵy Baqdáýlet Ábdihamıtov.
Bir aıta keter jaıt, osyǵan deıin de Almatyda meshit jamaǵaty arasynda kóptegen sporttyq is-shara uıymdastyryldy. Máselen, bıyl shaǵyn fýtbol jarysynda 400-den asa komanda kúsh synasty. Qatysýshylardyń jalpy sany 3 myńnan asa adamdy qurdy. Qalalyq din isteri jónindegi basqarmasynyń alǵa qoıǵan josparlary óte kóp. «Deni saýdyń – jany saý» degen qaǵıdany ustanǵan olar dinı jáne memlekettik meıramdar qarsańynda qoshqar kóterý, arqan tartý, gir tasyn kóterý, asyq atý jáne taǵy basqa qazaqtyń ulttyq sport túrlerin damytyp, nasıhattaý maqsatynda birqatar jarys uıymdastyrýdy kózdep otyr.
ALMATY
