Baǵa sharyqtamaıdy

Qalalyq ákimdik ókilderi baǵa turaqtylyǵyn baıqaý maqsatynda Semeıdiń saýda oryndaryn aralap kórdi. Ásirese, áleýmettik qajettilik bolyp tabylatyn birinshi kezektegi nan ónimderiniń baǵasy basty nazarda tur. Osyǵan oraı qala ákiminiń orynbasary Jaǵyparbek Elýbaev, kásipkerlik bóliminen Ámına Syzdyqovalar janar-jaǵarmaı quıý beketi, dárihana jáne sýpermarketterde boldy. Janar-jaǵarmaı kólik júrgizýshiler úshin turaqty baǵada, Aı-92 benzıni burynǵydaı 115 teńgede eken. Mudan soń qala dúkenderine bas suqqan jumys toby ondaǵy áleýmettik baǵalarǵa nazar aýdardy. Munda kartop, sábiz – 61 teńge, qant – 155 teńge, birinshi sort nan – 48 teńge, sol sııaqty basqa da ónimderiniń sharyqtap ketkeni baıqalmady. Dúken satýshysy Mıra Alımjanovanyń aıtýynsha, reseılik taýar jetkizýshiler baǵany kóterýi múmkin. Erteńnen bastap, barlyq reseılik ónimderge 20 paıyz baǵa kóteriledi degen eskertpe aldyq. Árıne, sheteldik taýarǵa baǵa qymbattasa da dúken ıeleri de asa qymbat ústeme qospaıtyn bolady. Dúkenderde baǵa turaqty eken, bul bizdi qýantady, dedi ákim orynbasary Jaǵyparbek Elýbaev, eger baǵa kóterilip ketse, qarapaıym halyqqa, bir jalaqymen ǵana, ne zeınetaqymen otyrǵandarǵa asa qıyn. Eger sheteldik ónim qymbattap kelse de, sizder eki ese baǵasyn ósirip jibermeımiz degenderińiz durys. Ár nársege sabyrmen qaraǵan jón. Budan soń ákimdik ókilderi baǵa saıasatyna oraı brıfıng ótkizdi. Oǵan aýylsharýashylyq bóliminiń bastyǵy A. Sýıchınov, «Shyǵys-Samǵaý» turaqtandyrý qorynyń bastyǵy T. Muratovtar qatysty. 2014 jyldyń 11 aqpanynan bas­tap baǵa turaqtylyǵy jáne monıtorıng júrgizýge oraı jumys toby qurylǵan. Jeke saýda núktelerimen memorandýmǵa qol qoıylǵan. Onda ústeme baǵa 10 paıyzdan aspaıtyn bolady. Kádimgi nan baǵasy 50 teńgeden aspaýy tıis. Osyǵan oraı 189 memorandým bekitildi. «Semnan» jáne «Shyǵys nan ónimderi» JShS baǵany nanǵa 45-50 teńgeden ustaıtyn bolady. Qaladaǵy 30 dúkende turaqtandyrý qorynyń ónimderi satylady. Onda oramjapyraq, qyzylsha sııaqty aýylsharýashylyq ónimderi 61 teńgeden joǵary kóterilmeıtin bolady. Raýshan NUǴMANBEKOVA. SEMEI.