Senator Baqtybaı Shelpekov zań jobasy qylmystyq kiristerdi zańdastyrýǵa jáne terrorızmdi qarjylandyrýǵa qarsy is-qımyl jónindegi Eýrazııalyq toptyń ózara baǵalaýynyń ekinshi raýndyn ótkizer aldynda, ulttyq zańnamaǵa FATF-tyń standarttarynan týyndaıtyn halyqaralyq mindettemelerdi, memlekettiń ishki deńgeıinde naqty iske asyrý, ıaǵnı ımplementasııalaý maqsatynda ázirlengenin aıtty.
«Jobada kórsetilgen zańnamalyq sharalar sarapshylardyń ózara baǵalaý kezindegi týyndaýy múmkin eskertpelerdi boldyrmaýǵa jáne elimizdi halyqaralyq uıymdar men Birikken Ulttar Uıymyna múshe memleketter tarapynan yqtımal ekonomıkalyq sanksııalardan saqtandyrýǵa múmkindik beredi. Budan basqa, elimizdegi laýazymdy tulǵalardyń aqshamen jáne ózge múlikpen jasaıtyn operasııalary boıynsha tıisti baqylaýdy zańnamalyq deńgeıde belgileý kózdelgen. Al qarjy monıtorıngi agenttigi, óz kezeginde osy adamdardyń jáne otbasy músheleriniń, jaqyn týystarynyń jeke tizimin júrgizetin bolady», dedi senator.
Sondaı-aq jobada sıfrlyq aktıvterdi shyǵarý, olardyń saýda-sattyǵyn uıymdastyrý, osy aktıvterdi aqshaǵa, ne bolmasa basqa múlikke aıyrbastaý jónindegi qyzmetterdi júrgizetin tulǵalardy, qarjy monıtorıngi sýbektilerine jatqyzý qarastyrylǵan.
«Mekemeniń zańdy ıesi týraly málimetterdiń ashyqtyǵyn belgileý maqsatynda ýákiletti organǵa ulttyq tiziliminiń derekterine qol jetkizý usynylǵan. Osy zań jobasymen 4 zańǵa tıisti ózgerister men tolyqtyrýlar engiziledi. Bul «Sáıkestendirý nómirleriniń ulttyq tizimderi týraly», «Qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl týraly», «Ruqsattar jáne habarlamalar týraly», «Aqparattandyrý týraly», dep túsindirdi Baqtybaı Shelpekov Senatta.
Qarjy jáne bıýdjet komıteti «Qazaqstan Respýblıkasynyń keıbir zańnamalyq aktilerine qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» zańdy qabyldaýdy surady.
О́z kezeginde depýtattar talqylaýdan keıin zań jobasyn qabyldady.
