«Eldegi ekonomıkalyq jaǵdaı men ulttyq múddeler barlyq aýǵandyqtardan saýdada otandyq valıýtany qoldanýdy talap etedi», deıdi talıbandar.
«Talıban» bılikti óz qolyna alǵannan keıin halyqaralyq qarjylyq qoldaýdyń toqtatylýyna baılanysty eldegi ekonomıkalyq jaǵdaı tyǵyryqqa tirelgen.
Osyǵan deıin AQSh dollary Aýǵanstan naryǵynda keńinen qoldanylyp kelgen. Sondaı-aq dollar Pákistan sııaqty Aýǵanstannyń kórshilerimen shekaralas aýdan-
darda saýda jasaý úshin de jıi qoldanysta bolǵan.
«Islam ámirligi barlyq azamattarǵa, dúken ıelerine, saýdagerlerge, kásipkerlerge jáne jalpy jurtshylyqqa Aýǵanstannyń barlyq qarjylyq operasııalaryn jalǵastyrýǵa jáne shetel valıýtasyn paıdalanýdan qatań bas tartýǵa nusqaý beredi», dedi «Talıban» ókili Zabıhýlla Mýjahıda ınternette jarııalaǵan málimdemesinde. Al buıryqty oryndamaǵan kez kelgen adam sot aldynda jaýapqa tartylady.
Tamyz aıynda «Talıban» bıligi eldi baqylaýǵa alǵannan keıin, AQSh Federaldy rezervtik júıesi men Eýropanyń ortalyq bankteri Aýǵanstannyń sheteldik aktıvterin, ıaǵnı mıllıardtaǵan dollaryn «qatyryp» qoıǵan. Al talıbandar elde qolma-qol aqsha tapshylyǵyna tap bolǵanda, shetelde saqtalǵan Aýǵanstan aktıvterin bosatýdy talap etken.
Aýǵanstan, sondaı-aq sheteldik kómek pen qaıyrymdylyq jobalarynan da aıyryldy. Shetelden kelgen granttar buǵan deıin memlekettik shyǵyndardyń tórtten úshin qarjylandyryp kelgen eken.
Osy jyldyń basynda Halyqaralyq valıýta qory (IMF) Aýǵanstan budan bylaı óz resýrstaryna qol jetkize almaıtynyn málimdedi, al Dúnıejúzilik bank eldegi jobalardy qarjylandyrýdy toqtatqan.
