Qazan aıyna josparlanǵan syrt aıdyndaǵy sońǵy eki oıynyn jeńispen aıaqtap, táýir oıyn kórsete bastaǵan «Barys» qaıta sátsizdikke ushyrady. О́z aıdynynda «Iokerıt» klýbyn qabyldaǵan jerlesterimiz qarsylastaryna 1:4 esebimen jol berdi. Birinshi kezeń teń dárejede ótse de, kezeń aıaqtalar tusta eptilik tanytqan qonaqtar Ionı Ortıo qorǵaǵan qaqpaǵa jaýapsyz eki shaıba soǵyp ketti. Kezdesýdiń 16-mınýtynda Kalle Kosıla esep ashsa, 19-mınýtta Nıklas Ensen mergendik tanytty.
Oıynnyń ekinshi kezeńi de fınlıandııalyq hokkeıshilerdiń basymdyǵymen ótti. 29-mınýtta Nıklas Ensen taǵy da mergendigimen kózge túsip, dýbldiń avtory atandy. Úshinshi kezeńniń basynda qarsylas oıynshysy muzaıdynnan eki mınýtqa qýylyp, san basymdyǵyna ıe bolǵan «Barys» 42-mınýtta esep aıyrmasyn qysqartty. Goldyń avtory – Nıkıta Mıhaılıs. Degenmen match sońyna deıin aıdyn ıeleriniń tarazy basyn teńestirýge shamalary jetpedi. Kezdesýdiń aıaqtalýyna 30 sekýnd qalǵanda «Iokerıt» oıynshysy Marko Antılla bos qaqpaǵa gol salyp, oıynnyń núktesin qoıdy – 1:4.
