ShQO kásipkerlik jáne ındýstrıaldy-ınnovasııalyq damý basqarmasynyń málimetinshe, oblys ortalyǵynda jyl basynan beri sábiz, kartop, qyryqqabat, pııaz, kúnbaǵys maıy, taýyq eti, qaraqumyq jarmasy, qant baǵasy qymbattaǵan.
Kásipkerlik basqarmasy basshysynyń orynbasary Olga Grıgoreva atap ótkendeı, óńirde baǵa monıtorıngi júrgizilip, olardy turaqtandyrý boıynsha túrli sharalar qabyldanýda. Un, qant, jumyrtqa, kókónis baǵalaryn turaqtandyrý úshin «aınalym shemasy» sheńberinde «Krýpnoff» JShS, «Agrofırma «Prırechnoe» JShS, «Semey Qus» JShS kompanııalaryna qaryz berildi. Olardyń ónimderi «Ertis» áleýmettik-kásipkerlik korporasııasynyń saýda pavılondarynda О́skemen jáne Semeı qalalarynda tirkelgen baǵalar boıynsha satylady. «Ertis» ÁKK arqyly qosymsha 3 myń tonna kartop, 400 tonna sábiz jáne ózge ónimder ótkeriledi.
«2 700 kóterme satýshymen, aýyl sharýashylyǵy taýaryn óndirýshilermen jáne saýda obektilerimen eń tómengi jeti paıyzdyq saýda ústemesin qoldaný týraly memorandýmdar jasaldy. Al 1 surypty un, nan, kúnbaǵys maıy, qaraqumyq jarmasy baǵasyn turaqtandyrý úshin oblys ákimdigi men «Azyq-túlik kelisim shart korporasııasy» ulttyq kompanııasy arasynda 20 myń tonna bıdaı astyǵyn, 9 myń tonna kúnbaǵys tuqymyn, 6 myń tonna qaraqumyq tapsyrý boıynsha memorandým jasaldy», dep atap ótti Olga Grıgoreva.
Jalpy, Shyǵys Qazaqstan boıynsha 44 áleýmettik dúken jáne 465 áleýmettik burysh jumys isteıdi, onda negizgi áleýmettik mańyzy bar azyq-túlik taýarlary eń tómengi saýda ústemesin qoldana otyryp satylady.
О́ńir kásipkerlerimen satyp alý baǵasynyń 15 paıyzynan aspaıtyn shekti saýda ústemesiniń mólsherin saqtaý bóliginde zańnama normalaryn túsindirý boıynsha jumys júrgizilýde.
