Qazaqstan Respýblıkasy Táýelsizdiginiń 30 jyldyǵyna arnalǵan halyqaralyq kórme jobasyn Qazaqstan Respýblıkasynyń Tuńǵysh Prezıdenti – Elbasy kitaphanasy, «Elbasy Akademııasy» korporatıvtik qory, Qazaqstan Respýblıkasynyń Syrtqy ister mınıstrligi jáne Qazaqstan Respýblıkasynyń Túrkııa Respýblıkasyndaǵy Elshiligimen birlese uıymdastyrdy.
Kórme Elbasy N.Á. Nazarbaevtyń qazirgi qazaqstandyq memlekettilik tujyrymdamasyn júzege asyrý nátıjesi negizindegi Qazaqstan Respýblıkasy damýynyń mańyzdy kezeńderin kórsetýdi kózdeıdi.
«1991 jylǵy 16 jeltoqsanda egemendigimizdi moıyndaǵan álemdegi eń alǵashqy el Túrkııa Respýblıkasy boldy. Bul tarıhı oqıǵany Qazaqstan halqy joǵary baǵalaıdy ári máńgilik jadynda saqtaıdy. Osyǵan baılanysty Qazaqstan Respýblıkasynyń Tuńǵysh Prezıdenti – Elbasymyz Nursultan Nazarbaevtyń: «Qazaqstan men Túrkııa – ejelden enshisi bir, tamyrlas týys elder», – degen ulaǵatty sózi bar. Búgingi kórmemizdiń «Qazaqstan joly. Túrki birligi» dep atalýy da kezdeısoq emes. Kórme Qazaqstan táýelsizdiginiń 30 jyldyǵyna jáne baýyrlas túrki memleketteriniń elimizdi nyǵaıtýdaǵy róline arnalǵan», dedi Qazaqstan Respýblıkasynyń Tuńǵysh Prezıdenti – Elbasy kitaphanasynyń dırektory Baqytjan Temirbolat.
«Qazaqstan Respýblıkasynyń Tuńǵysh Prezıdenti – Elbasy kitaphanasynyń kórmeleri buǵan deıin Reseı men Japonııada, al búgin Túrkııada ótkizilip otyr. Bul Qazaqstan Táýelsizdiginiń 30 jyldyǵy qarsańynda ótip jatqan óte mańyzdy is-shara. Kórmeniń «Qazaqstan joly: túrki birligi» ataýy Nursultan Ábishuly Nazarbaevtyń túrki áleminiń jandanýyna, Qazaqstannyń táýelsizdik alýyna qosqan zor úlesin jáne onyń zamanaýı memleketti jańǵyrtýdaǵy rólin kórsetedi», dep atap ótti Qazaqstan Respýblıkasynyń Túrkııa Respýblıkasyndaǵy Elshisi Abzal Saparbekuly.
Túrkııa Respýblıkasynyń Prezıdenti Rejep Taııp Erdoǵannyń quttyqtaý hatyn Túrkııa Prezıdenti Ákimshiligi janyndaǵy Ulttyq kitaphananyń dırektory Aıhan Týglý oqyp berdi.
«Qazaqstan Túrki keńesi, TÚRKPA, TÚRKSOI jáne Túrki akademııasy sııaqty uıymdardyń qurylýy men ınstıtýsıonaldyq damýynda jetekshi rólge ıe. Túrki áleminiń sarabdal kóshbasshysy, Qazaqstannyń Tuńǵysh Prezıdenti – Elbasy Nazarbaevtyń bul úderistegi bekem ustanymy bizdi jigerlendirdi. Prezıdent Qasym-Jomart Toqaev myrza da bizdiń Túrki álemindegi yntymaqtastyǵymyzdyń tabysty damýyna belsendi úles qosýda. Halyqtarymyz arasyndaǵy til, nanym-senim, tarıh syndy rýhanı kópirlerdi kúsheıte otyryp, barlyq isterde birlikke qol jetkizemiz dep senemiz», delingen Rejep Taııp Erdoǵannyń quttyqtaýynda.
Kórermender nazaryna Elbasy kitaphanasynyń arhıv, kitap, mýzeı qoryndaǵy 400-den astam saqtaý birligi, onyń ishinde kıim, qarý, áskerı jáne at ábzelderi toptamasyndaǵy zattar, azattyq úshin kúrestiń túrli kezeńderindegi Qazaqstan tarıhy boıynsha artefaktiler usynyldy. Máselen, onyń arasynda XIX ǵasyrdaǵy qazaq qylyshy, bilezikter men saqınalar bar.
«Uly dala eli: keshegi men búginginiń arasy» bólimindegi mýzeı jádigerleri men arhıv qujattary arqyly Qazaqstannyń tarıhymen tanysýǵa bolady. Sondaı-aq kórme jádigerleri Qazaqstannyń Tuńǵysh Prezıdenti – Elbasy N.Á. Nazarbaevtyń jeke qasıetterin qalyptastyrǵan ortaǵa tereń boılatyp, onyń «Uly dalanyń jeti qyry» maqalasynyń baǵdarlamalyq tezısterimen tanystyrady. Ekspozısııaǵa etnografııalyq keshen, zergerlik buıymdar, kıim-keshek, qarý-jaraq, áskerı jáne at ábzelderi toptamasynan alynǵan zattar, sondaı-aq qazaqstandyq jáne reseılik tanymal sýretshilerdiń kartınalary qoıylǵan.
«Qazaqstan joly» bólimi azattyq alǵannan keıingi Qazaqstannyń memlekettik damý strategııalarynyń, qazirgi zamanǵy memlekettiliktiń tabysty, turaqty qalyptasýynyń ózegine aınalǵan totalıtarlyq júıeden demokratııalyq erkindik pen kópqurylymdy ekonomıkaǵa ótýge baǵyttalǵan negizgi reformalardyń mazmunyn ashady. Bólimniń ekspozısııasynda arhıvtik foto jáne beınematerıaldar, Qazaqstan Respýblıkasynyń Tuńǵysh Prezıdenti – Elbasy N.Á. Nazarbaevtyń qurmet belgileriniń, qazaqstandyq jáne halyqaralyq qoǵamdyq nagradalardyń, Álemdik jáne dástúrli dinder sezine qatysýshylar tartý etken syılyqtardyń mýzeılik jınaǵy usynylǵan.
«Túrki birligi» bólimi Túrkııa Respýblıkasynyń birinshi basshylary men delegasııa jetekshileriniń marapattary, dıplomatııalyq syılyqtary, eki el basshylarynyń resmı qujattary men jeke hattary arqyly Qazaqstan men Túrkııa arasyndaǵy ekijaqty qarym-qatynastyń joǵary deńgeıin aıqyn kórsetedi. Sonymen qatar Elbasynyń jeke kitaphanasy men jeke arhıvinen alynǵan kitaptar jıyntyǵynda túrki birligi ıdeıalary keńinen kórinis tapqan.
«Qazaqstan joly. Túrki birligi» kórmesinde N.Á. Nazarbaevtyń basty saıası bastamalaryna basymdyq berilgen. Mazmuny baı, maǵynasy tereń bastamalar álemdik qaýymdastyq tarapynan oń baǵa alyp, búginde dúnıe júzi boıynsha aıtarlyqtaı nátıje berdi.
