Kezdesý barysynda Máýlen Áshimbaev Pontıfıkke Qazaqstan Prezıdenti Qasym-Jomart Toqaevtyń atynan Álemdik jáne dástúrli dinder lıderleriniń VII Sezine shaqyrý hatyn tabys etti.
Suhbat kezinde Senat Spıkeri Qazaqstannyń konfessııaaralyq kelisimdi nyǵaıtýǵa jáne jahandyq dinaralyq dıalogty ilgeriletýge baǵyttalǵan bastamalary týraly aıtyp, olardyń Vatıkannyń qyzmetimen tyǵyz baılanysty ekenine nazar aýdardy.
«Etnosaralyq beıbitshilik jáne kelisim, ár azamattyń dinı kózqarasyna degen qurmet qazaqstandyq mádenıet pen mentalıtettiń ajyramas bólshegi. Biz toleranttylyqty saqtaýǵa jáne ony dáripteýge basa mán berip kelemiz. Sol sebepti, bizdiń Tuńǵysh Prezıdentimiz Nursultan Nazarbaev 2003 jyly Álemdik jáne dástúrli dinder lıderleriniń Sezin shaqyrý týraly bastama kóterdi. Bul Forýmnyń jumysyn damytýǵa Sezd Hatshylyǵynyń Basshysy retinde Memleket basshysy Qasym-Jomart Toqaev aıtarlyqtaı úles qosty», dedi Máýlen Áshimbaev.
Sondaı-aq, ol Vatıkannyń elimizdiń atalǵan bastamasyna qoldaý kórsetip kele jatqany úshin alǵys bildirdi.
«Qazaqstan uıytqy bolǵan dinaralyq forým 18 jyldyń ishinde mazmundy dıalog quratyn ashyq alańǵa aınaldy. Osy múmkindikti paıdalana otyryp, Qazaqstannyń bastamasyna qoldaý kórsetip kele jatqany úshin Qasıetti Taqqa alǵysymdy bildiremin. Buǵan deıin Álemdik jáne dástúrli dinder lıderleriniń alty Sezi ótkizildi. Sonyń bárine Katolık shirkeýiniń joǵary laýazymdy ókilderi belsendi túrde qatysyp keledi», dedi Senat Tóraǵasy.
Aldaǵy Sezde pandemııadan keıingi kezeńde adamzattyń rýhanı-áleýmettik damýyndaǵy álemdik jáne dástúrli dinder lıderleriniń rólin talqylaý josparlanyp otyr. Osyǵan oraı taraptar din qaıratkerleri pandemııamen jáne onyń áleýmettik-ekonomıkalyq jáne gýmanıtarlyq saldarymen kúreske úlken úles qosa alatynyna senim bildirdi.
«Pandemııadan sabaq alýǵa, onyń saldarymen kúreske din lıderleriniń qosar úlesi mol. Búkil álemdi sharpyǵan indet adamzattyń qordalanǵan problemalaryn odan ári ýshyqtyryp jiberdi. Olardyń qatarynda kedeıshilik, teńsizdik, kóptegen eldegi densaýlyq saqtaý júıesiniń múshkil jaǵdaıy, adamdardyń bilim deńgeıiniń tómendigi, ekologııa jáne taǵy basqa ózekti máseleler bar. Sondaı-aq pandemııadan keıingi kezeńde tutynýshylyq basymdyqtar qaıta qaralyp, rýhanı jáne adamgershilik qundylyqtar birinshi orynǵa shyǵýǵa tıis», dedi Máýlen Áshimbaev.
Rım Papasy Fransısk Qazaqstan Prezıdenti Qasym-Jomart Toqaevqa kelesi jyly qyrkúıekte ótetin Álemdik jáne dástúrli dinder lıderleriniń VII Sezine qatysýǵa Qazaqstanǵa shaqyrǵany úshin alǵysyn bildirdi. Sondaı-aq Pontıfık Elbasynyń Sezdi shaqyrý týraly bastamasynyń mańyzdy ekenine nazar aýdaryp, Qazaq eliniń jahandyq dinaralyq dıalogty damytýǵa aıtarlyqtaı ról qosyp otyrǵanyn atap ótti.
Suhbattasýshylar halyqaralyq kún tártibindegi mańyzdy máselelerdi de talqylady. Atap aıtqanda, Aýǵanstandaǵy jaǵdaıǵa, jahandyq klımattyń ózgerýine jáne taǵy basqa túıtkilderge nazar aýdardy.
Budan basqa, Máýlen Áshimbaev búgin Vatıkannyń Memlekettik hatshysy Petro Parolınmen kezdesip, Qazaqstan men Vatıkan arasyndaǵy yntymaqtastyq máselelerin sóz etti.
Sonymen birge Qazaqstan Senatynyń Tóraǵasy sapar aıasynda Papa keńesiniń dinaralyq dıalog jónindegi prezıdenti kardınal Mıgel Anhel Aıýso Gıksotpen kezdesti.
