ShQO Tótenshe jaǵdaılar departamenti baspasóz qyzmetiniń málimetine súıensek, qutqarýshylarǵa Sasyqkól kólinde 23 jastaǵy balyqshynyń joǵalyp ketkeni týraly habar tústi.
Belgili bolǵandaı, er adam 4 qarashada keshki saǵat 20.00-22.00 aralyǵynda qaıyqpen balyq aýlaýǵa shyǵyp, sol kúıi qaıtyp oralmaǵan.
«TJD qyzmetkerleri men polıseıler balyqshyny tún ortasyna deıin izdegenimen esh nátıje shyqpady. 5 qarasha kúni oqıǵa ornyna №17 órt sóndirý bólimshesinen 5 adam men «KÝNG» avtokóligi jumyldyryldy. 6 qarashada О́skemennen súńgýirler kelip jetti. Sol kúni jaǵalaýdan 1 shaqyrymdaı qashyqtyqta muz astynan balyqshy qaıyǵynyń benzın bagy tabylǵan», delingen aqparatta.
Qutqarýshylar, jergilikti atqarýshy organ ókilderi men turǵyndar birlesip júrgizgen izdestirý sharalarynyń nátıjesinde 7 qarashada sýdan er adamnyń máıiti tabyldy.
