Oqıǵa ornyna jedel jetken polıseıler órttiń turǵyn úıdiń janyndaǵy jabyq aýladan shyǵyp jatqanyn ańǵarady. Al onda otyn, kómir, jáne basqa da janǵysh zattar bolýy múmkin. Mundaı saraıdyń bir bóliginde úı ıeleri de bolýy kádik. Tipti adam bolmasa da sýmańdaǵan jalyn turǵyn úıge kóship, báribir úı ıelerin qaterge ushyratýy yqtımal. Esh oılanbastan eki jas polıseı otty aýyzdyqtaýǵa shuǵyl kirisip ketedi.
Aldymen olar órt sóndirýshilerge dabyl qaǵyp, sosyn ashyla qoımaǵan úıdiń syrtqy esigin buzyp kirip, aldymen úsh gaz balonyn syrtqa shyǵarady. Bul kezde úıdegi jandar da oıanyp, dalaǵa shyǵýǵa tyrysyp jatqan. Esikten engen qalyń tútin olardy tunshyqtyrýǵa aınalady. Esi shyǵyp ketken 80-degi keıýana esikti taba almaı, tek «qutqaryńdar» dep aıǵaılaýdy bilgen. Ofıserler qart áıeldiń dalaǵa shyǵýyna kómektesip, taza aýaǵa alyp shyǵyp, esin jınatady. Sosyn onyń ótinishi boıynsha dári-dármekterin de alyp shyǵady. Odan ári polıseıler ábden qoryqqan keıýanany patrýldik kólikke otyrǵyzyp, úıdiń barlyq bólmelerin tekserip, kelgen kórshilerimen birge janyp jatqan jalynǵa shelektermen sý quıa bastaıdy.
Osy ýaqytta órt sóndirýshiler de jetip, órtti jarty saǵattan astam ýaqytta túpkilikti óshirgen.
Osy oqıǵadan keıin 2,5 aı ótkende jas polıseılerge Tótenshe jaǵdaılar mınıstri Iý.Ilınniń qol qoıǵan Alǵys haty tabys etildi. Aıyrtaý aýdanynyń TJ bóliminiń basshysy, azamattyq qorǵaý podpolkovnıgi Esmaǵzam Seıitjan tártip saqshylarynyń kásibıligi men jedeldigin atap ótti.
Soltústik Qazaqstan oblysy
