Túngi saǵat 9:25-te Mańǵystaý oblysy Tótenshe jaǵdaılar departamentiniń Daǵdarys jaǵdaılardy basqarý basqarmasyna Aqtaý qalasynyń 29-shy shaǵyn aýdanyndaǵy «Sherqala» eki qabatty kesheniniń aýmaǵynda jarylys bolǵany týraly telefon habarlamasy kelip tústi. Jarylys bolǵan jerde jedel shtab quryldy.
Oblys ákimi, azamattyq qorǵaý qyzmetiniń basshysy, Aqtaý qalasy ákimdigi oqys oqıǵa bolǵan jerde júr. Avarııalyq-qutqarý jumystaryna 70 adam, 11 tehnıka, tótenshe jaǵdaılardy joıýdyń kúshteri men quraldary jumyldyryldy. Sondaı-aq 150 polısııa qyzmetkeri, 20 tehnıka, azamattyq qorǵaý ınjenerlik qyzmeti jáne energetıka qyzmetteri tartyldy.
Kınologııalyq qyzmettiń barlaýy boıynsha, jarylys ornynda zardap shekkender joq ekeni anyqtaldy. Muny «Sherqala» kesheni ıesiniń «barlyq jumysshylar jumys kúni aıaqtalyp, keshki saǵat 18-20 shamasynda ǵımarattan shyǵyp ketti» degen sózi de rastaıdy.
Jarylystyń aldyn ala sebebi gaz-aýa qospasynyń aǵýynan bolýy múmkin. Qazirdiń ózinde oqıǵa ornynan eki gaz ballony shyǵaryldy.
TJ ókilderiniń aıtýynsha, úıindilerdiń astynda taǵy eki gaz ballony bar. Olardyń árqaısysynyń syıymdylyǵy 50 lıtr. Tolyǵyraq aqparat oqshaýlaý jáne joıýdan keıin beriledi.
