Tórtkúl dúnıeniń eń myqty karateshileri bas qosatyn baıraqty básekede Qazaqstannyń 10 sportshysy saıysqa túsedi. Solardyń arasynan Sofıa Berýlseva men Qaısar Alpysbaıdy bóle-jara atap ótýge bolady. +68 kg salmaqtaǵy Sofıa nebári 20 jasta. Soǵan qaramastan ol bıyl Tokıoda alaýy tutanǵan Olımpııa oıyndarynda qola medaldy ıelenip, barsha jankúıerdiń qoshemetine bólendi. 60 kg salmaqtaǵy Qaısar Alpysbaı da birqatar bıik belesti baǵyndyrdy. Bıylǵy jyldyń basynda qandasymyz Chılıdiń astanasy – Santıagoda ótken «Premer-lıga» dodasynda bas júldeni oljalady.
Joǵaryda esimderi atalǵan eki sańlaqpen qatar, Abý-Dabıdegi jarysta Móldir Jetibaı (50 kg), Sabına Zaharova (55 kg), Nıkol Sengel (61 kg), Ásel Qanaı (68 kg), Dıdar Ámiráli (67 kg), Nurqanat Ájiqanov (75 kg), Igor Chehmarev (84 kg) jáne Danııar Iýldashev (+84 kg) kúsh synasady.
