Jıynnyń moderatory Bilim jáne ǵylym mınıstrligi Joǵary jáne joǵary oqý ornynan keıingi bilim departamenti dırektorynyń orynbasary Baný Narbekova sóz sóılep, bilikti maman daıarlaý máselesine toqtalyp, bilim berý isinde nazarda ustaıtyn basymdyqtarǵa toqtaldy.
Abaı atyndaǵy Qazaq ulttyq pedagogıkalyq ýnıversıtetiniń rektory Darhan Bilálov bilim berý salasy úshin kadr daıarlaýdyń ózektiligi, ýnıversıtettegi bilim berý baǵdarlamalary týraly aıtyp ótti.
Is-shara barysynda elimizde arnaıy pedagogtardy daıarlaýdyń aldynda turǵan syn-qaterler, bilim berý baǵdarlamalary, ǵylymı-ádistemelik qamtamasyz etý, jumysqa ornalastyrý, sonymen qatar aýtızm jáne mentaldy aýytqýshylyǵy bar balalardy qoldaý jónindegi jobalyq toptyń jumysyna qatysty máseleler aıtyldy.
Abaı atyndaǵy QazUPÝ Pedagogıka jáne psıhologııa ınstıtýtynyń dırektory Ǵalııa Abaeva, Aqyl-esiniń nemese boı-bitiminiń jetilýinde kemistigi bar balalar men jasóspirimderdi áleýmettik beıimdeý jáne kásibı eńbekpen ońaltý ortalyǵynyń bas dırektory Roza Súleımenova, QazUQyzPÝ Pedagogıka jáne psıhologııa ınstıtýtynyń dırektory Gúljan Orazaeva, Abaı atyndaǵy QazUPÝ bazasyndaǵy JOO ınklıýzıvti bilim berý boıynsha resýrstyq keńes berý ortalyǵynyń dırektory Zýlfııa Movkebaeva, Arnaıy jáne ınklıýzıvti bilim berýdi damytýdyń ulttyq ǵylymı-praktıkalyq ortalyǵynyń dırektory Áıgerim Kýderınova, aýtızm jáne basqa da mentaldy aýytqýshylyǵy bar balalardy qoldaý júıesin qurý boıynsha jobalyq toptyń úılestirýshisi Ásel Júnisova baıandama jasady. Qatysýshylar pikir almasyp, nátıjesinde arnaıy pedagogtardy daıarlaýdy jetildirý jónindegi is-sharalar jospary bekitildi jáne joǵary oqý oryndary úshin usynymdar ázirlendi.
Jıynǵa elimizdiń joǵary oqý oryndarynyń mamandary, Jumys berýshiler qaýymdastyǵynyń ókilderi onlaın rejimde qatysty.
