Ár jyl saıyn áıelder arasynda úzdiksiz ótip turatyn dástúrli týrnır buǵan deıin Federasııa kýbogy dep atalyp keldi. Byltyrdan beri ol Bıllı Djın Kıng kýbogy degen ataýǵa ıe boldy. Bul esim jankúıerlerge jaqsy tanys. Amerıkalyq tennısshi ótken ǵasyrdyń 60-shy jáne 70-shi jyldary dúbirli dodalarda dara talantymen oqshaýlanyp, kóptegen tolaǵaı tabystarǵa qol jetkizdi. Kıng «Úlken dýlyǵa» sanatyndaǵy týrnırlerde 36 márte top jardy. Tarqatyp aıtsaq, 12 ret jekelegen básekeniń jeńimpazy atanyp, 16 ret juptyq saıysta dara shyqty. Taǵy bir márte mıkste bas júldeni oljalady. WTA týrnırlerin 67 ret utyp, álemniń birinshi raketkasy atanǵan Bıllı óz dáýiriniń dara tulǵalarynyń biri boldy.
Atalǵan dodada AQSh quramasy eń kóp oljaǵa keneldi. Amerıkalyqtar 18 jarysta aldaryna jan salmady. Chehııa 11 márte shashasyna shań juqtyrmasa, Aýstralııanyń asyǵy 7 ret alshysynan tústi. Sondaı-aq Ispanııa – 5, Italııa men Reseı – 4, Fransııa – 3, Germanııa – 2, Belgııa, Slovakııa jáne OAR bir-bir retten teńdessiz dep tanyldy.
Jekelegen oıynshylar arasynda Krıs Everttiń shoqtyǵy bıik. Áıgili amerıkalyq tennısshi óz komandasymen birge kýboktyń segiz márte ıegeri atandy. Bıllı Djın Kıng pen Rozmarı Kasals AQSh quramasynyń eń bıik belesterden kórinýine jeti ret orasan zor úles qosty. Petra Kvıtova men Barbora Strysova syndy tennısshiler Chehııany alty týrnırde órge súıredi. Ispanııalyq Konchıta Martınes pen Arancha Sanches-Vıkarıo, chehııalyq Lýsııa Gradeskaıa men Lýsııa Shafarjova bes márte dál sondaı qurmetke bólendi. Mine, atalǵan jarysta eń tabysty óner kórsetken oıynshylar osylar.
Bıllı Djın Kıng kýbogy fınalyna joldama alý úshin Qazaqstannyń tennısshileri Germanııamen oınaıdy. Bul báseke kelesi jyldyń 15-16 sáýiri kúnderi Nur-Sultanda ótedi. Eger jerlesterimiz jeńiske jetse, onda óz tarıhymyzda tuńǵysh ret álemniń eń úzdik komandalarymen kúsh synasý múmkindigine ıe bolamyz. Al sol sheshýshi tusta bizben básekelesetin komanda jaıynda ne bilemiz?
Germanııa quramasy atalǵan jarystyń tusaýy kesilgen kezden, ıaǵnı 1963 jyldan beri úzdiksiz óner kórsetip keledi. Sol 51 jyldyń ishinde olar 44 ret Álemdik topta oınady. Barlyǵy 141 kezdesý ótkizip, 91 ret jeńiske jetti. Quramynda Shteffı Graf pen Klaýdıa Kode-Kılsh syndy myqty oıynshylary bar nemister 1987 jyly bas júldeni oljalasa, sol kórsetkishin 1992 jyly taǵy qaıtalady. Ol kezde komanda namysyn Shteffı Graftan bólek, Anke Hýber men Barbara Rıttner qorǵaǵan edi. Sheshýshi tusta olar alǵashynda AQSh, odan keıin Ispanııa quramalaryn qapy qaldyrdy. Al 1966, 1970, 1982, 1983 jáne 2014 jyldary nemis qyzdary aqtyq saıysta utyldy.
Bul kúnderi de Germanııa quramasy jer-jahandaǵy eń myqty komandalardyń sanatynda. Álemdik reıtıngte olar 7-oryndy ıelenýde. Nemisterdiń búgingi tańdaǵy eń úzdik oıynshysy 33 jastaǵy Anjelıka Kerber ekeni daýsyz. Kezinde AQSh pen Aýstralııanyń ashyq birinshilikterin utyp, Ýımbldonda top jarǵan ol osydan bes jyl buryn ǵana álemdik reıtıngtiń kósh basynda turdy. Qazirgi kezde Kerber WTA tiziminde 16-oryndy ıelenýde. Álemdik topqa joldama alý úshin bizdiń qyzdarǵa eń birinshi kezekte osy tennısshini tusaýlaý kerek.
Germanııanyń ekinshi raketkasy 34 jastaǵy Andrea Petkovıchtiń eń jaqsy kórsetkishi – Rolan Garrostyń jartylaı fınalyna deıin jetip, WTA týrnırlerinde jeti ret bas júldeni oljalaýy. Tasy órge domalap turǵan kezinde Petkovıch «TOP-10» tennısshiniń qataryna ense, búgingi tańda ol 75-oryndy enshileýde. Sonymen qosa, Laýra Zıgemýnd, Djýlı Nımaıer jáne Anna-Lena Frıdzamdy da atap ótýge bolady. Esimderi atalǵan nemis qyzdarynyń barlyǵy da «TOP-150» oıynshynyń sanatynda.
Qazaqstan qurama komandasynyń músheleri arasynda Elena Rybakınanyń qarqyny aıtarlyqtaı. Qazirgi kezde jerlesimiz álemniń 14-raketkasy atanyp otyr. Elena Pýtınseva 42-orynǵa jaıǵassa, Zarına Dıas 97-satyǵa turaqtady. Nur-Sultanda ótetin jarysta osy úsheýine erekshe senim artylady. Jastar býyny arasynan Anna Danılınanyń aıaq alysy jaman emes. Ázirge ol WTA reıtınginde 340-orynda turǵanymen, birte-birte sheberligi shyńdalyp kele jatyr deýge negiz bar.
