Shaqalaqtyń ózin dárigerler 31 aptalyq kezinde kesar tiligimen ota jasaý arqyly alǵan. О́ıtkeni anasynyń boıyndaǵy jaman indet tym qatty asqynyp ketken eken.
Soltústik Qazaqstan oblystyq densaýlyq saqtaý basqarmasy baspasóz qyzmetiniń habarlaýyna qaraǵanda, qazir ókiletti organdar adam ólimine baılanysty saraptama júrgizýde. О́limniń sebebi – joǵaryda aıtqanymyzdaı Covid-19-dyń kesirinen ókpeniń jappaı qabynýy.
«Dárigerler aıaǵy aýyr áıelge emdik-dıagnostıkalyq sharalardyń bárin tolyǵymen jasady. Em-domnyń bári kópbeıindi aýrýhananyń jan saqtaý bóliminde jasaldy, alaıda tıisti nátıje bermedi. Onyń ústine jas ana jaman indetke qarsy vaksına da qabyldamaǵan eken», deıdi oblystyq densaýlyq saqtaý basqarmasynyń baspasóz hatshysy Gúlnár Qalıeva.
Sóıtip, jaman indet taǵy bir jas ómirdi qyrshynnan jalmady. Adamdardyń oǵan qarsy kúresi – ázirge tek vaksına saldyrý ekendigin umytpaǵan jón. Bul tym bolmasa aýrýdyń qatty órshýine nemese aýyryp qalǵan kúnniń ózinde tezirek jazylýǵa sebepshi bolyp jatqany jıi aıtylýda. Búginde Soltústik Qazaqstan oblysynda 646 áıel atalǵan syrqattan emdelýde, onyń ishinde aıaǵy aýyr áıelder de bar.
PETROPAVL
