Eske sala ketsek, 7 qarashada «ArselorMıttal Temirtaý» aksıonerlik qoǵamynyń «Abaı» shahtasynda apat boldy. Apat saldarynan 6 kenshi qaza taýyp, ekeýi zardap shekti.
Depýtat keltirgen derekter boıynsha sońǵy 10 jylda «ArselorMıttal Temirtaý» metallýrgııalyq kompanııasynyń barlyq bólimshelerinde apat sany kóbeıgeni baıqaldy. Osy ýaqyt ishinde kompanııanyń kómir shahtalarynda 23 apat boldy, odan zardap shekken 41 adamnyń 19-y qaza boldy. Bul 2006 jáne 2008 jyldardaǵy eki iri apatty eseptemegendegi jaǵdaı, onda 71 shahter qaza tapqan. Sergeı Ershov ónerkásiptegi qaýipsizdiktiń jaı-kúıin jaqsartý úshin qazirgi kezde osy kásiporynda da, búkil memleket aýqymynda da úkimettik deńgeıde sharalar qabyldaý mańyzdy dep sanaıdy.
Senator óz saýalynda kompanııada ınvestısııalyq mindettemelerdiń oryndalmaýy, qyzmetkerlerdiń tıisti áleýmettik kepildikteriniń bolmaýy, jabdyqtardy jańǵyrtýdyń tolyq qarjylandyrylmaýy, bilikti kadrlardyń ketýi, sondaı-aq zııandy zattar shyǵaryndylaryn azaıtý jónindegi mindettemelerdiń oryndalmaýyna qatysty birqatar ózekti máselelerge nazar aýdardy.
«Úkimetti qabyldanǵan mindettemelerdi múltiksiz saqtaýǵa jáne apat pen ólimge dýshar etetin jaraqattaný sanynyń óse túsýine yqpal etetin jaǵdaıdy boldyrmaýǵa shaqyra otyryp, ózderiniń jeke otyrysynda salanyń jaǵdaıyn jáne «Arselordyń» jaı-kúıin qaraýdy suraımyz. Sondaı-aq qaýipti óndiris obektilerinde ónerkásip qaýipsizdigin qamtamasyz etý jónindegi naqty jáne júıeli sharalar, sondaı-aq qyzmetkerlerdiń áleýmettik ahýaly men óńirdegi ekologııalyq jaǵdaıdy jaqsartý jóninde «Arselormen» ınvestısııalyq kelisimdi qaıta qaraý týraly sharalar usynatyn bolsyn», dedi Sergeı Ershov depýtattyq saýalynda.
