Palata Tóraǵasynyń orynbasary Asqar Shákirov sharany ashyp, Memleket basshysynyń elimizdiń jańa ekonomıkalyq baǵyty, onyń ishinde Qazaqstannyń ónerkásiptik áleýetin ashýǵa negizdelýi tıis jeti negizgi qaǵıdaty belgilegenin atady.
Sońǵy 5 jylda qadaǵalanatyn sýbektiler sany az ǵana ósse de ónerkásip kásiporyndaryndaǵy apattar 30%-ǵa arta túskeni jáne jaǵdaıǵa taldaý jasaǵanda óndiristerde tehnogendik avarııalardyń týyndaý qaýpi burynǵysynsha joǵary deńgeıde qalyp otyrǵany aıtyldy.
«Memleket basshysy Qasym-Jomart Toqaev halyqqa Joldaýynda elimizdiń ónerkásiptik áleýetin ashý, onyń ishinde strategııalyq mańyzdy óndiristerdi, negizgi eksporttyq basymdyqtardy aıqyndaý, sondaı-aq ónerkásipti qoldaý sharalaryn shynaıy istermen tolyqtyrý jóninde naqty tapsyrmalar berdi. Osyǵan baılanysty uıymdyq mádenıettiń bir bóligi bolyp tabylatyn óndiristegi qaýipsizdiktiń joǵary mádenıetin qalyptastyrý, qoldaý jáne damytý qajet dep sanaımyz. О́ıtkeni ol óndiristik jáne ekonomıkalyq maqsattardan basym bolyp, barlyq qyzmet túrleriniń jalpyǵa birdeı jáne ajyramas bóligi bolýy tıis», dedi Asqar Shákirov.
Jaqynda Qaraǵandy oblysynyń «Abaı» shahtasynda bolǵan tótenshe jaǵdaı sekildi qaıǵyly oqıǵalardyń qaıtalanbaýy úshin ónerkásip qaýipsizdigi salasyndaǵy problemalardy sheshý asa mańyzdy. Osy aımaqtan saılanǵan senator Sergeı Ershov qazir ónerkásip qaýipsizdigi salasyndaǵy jaǵdaıdy jaqsartýǵa baǵyttalǵan zańnamalyq bastamalardy qaraý eń ótkir másele dep sanaıdy.
«Ýákiletti organǵa qaýipti óndiris obektilerin jańartý men tehnıkalyq qaıta jaraqtandyrýdyń birlesken josparyn jasaý men bekitý jóninde tıisti mindetterdi bere otyryp, qaýipti óndiris obektilerin paıdalanatyn uıymdarǵa tehnıkalyq qaıta jaraqtandyrýdyń birlesken josparyn oryndaý jáne birinshi basshyǵa tikeleı baǵynatyn óndiristik jeke baqylaý qyzmetin qurýǵa qajetti sharalar qabyldaý mindetterin bekitý qajet», dep atap ótti senator.
Parlamentshiler sonymen qatar ónerkásip qaýipsizdigi salasyndaǵy kadrlardyń ótkir tapshylyǵyn, ınspektorlar quramynyń qysqarýyn, sondaı-aq osy salada ǵylymı-zertteý qyzmetiniń tıisti dárejede júrgizilmeı kele jatqanyn atap ótti.
Tótenshe jaǵdaılar mınıstri Iýrıı Ilın ónerkásip qaýipsizdigi salasyndaǵy aǵymdaǵy jaǵdaı týraly úkimet saǵatyna qatysýshylarǵa baıandap berdi. Onyń aıtýynsha, jyl basynan beri bir jarym myńnan astam tekserý júrgizildi. Nátıjesinde zań buzylǵany týraly 27 myń derek anyqtaldy, adam ómiri men densaýlyǵyna zııan keltirý qaýipi úshin 1 184 adam 150 mıllıon teńgeden astam somaǵa jaýapkershilikke tartyldy, sondaı-aq 432 obektiniń jumysy toqtatyldy.
Mınıstr aǵymdaǵy jyldyń sáýir aıynda qabyldanǵan «О́nerkásiptik qaýipsizdik máseleleri boıynsha ózgerister men tolyqtyrýlar engizý týraly» Zańnyń arqasynda ónerkásip qaýipsizdigi salasyndaǵy zańnama erejelerin jetildirýge jáne memlekettik qadaǵalaýdy júzege asyrýdyń tıimdiligin arttyrýǵa qol jetkenin atap ótti. Sondaı-aq qaýipti obektilerdegi jumysshylardyń eńbek tártibin jaqsartý, azamattardy qaýipti óndiristik faktorlardan qorǵaý deńgeıin arttyrý jáne apat saldarynan ózge adamdarǵa zııan keltirý yqtımaldyǵyn azaıtý maqsatynda 40 normatıvtik quqyqtyq akt bekitildi.
Úkimet saǵaty otyrysyna tóraǵalyq etken Muhtar Qul-Muhammed kezdesý barysynda kóterilgen barlyq máseleler men aıtylǵan usynystar ortaq tizbege engizilip, jaýapty memlekettik organdar men mekemelerge jiberiletinin atap ótti.
