Mamandardyń sózinshe, vaksına aldymen 16 jastan 18 jasqa deıingi jasóspirimderge salynady. Bul óz kezeginde balalar arasyndaǵy aýrý kórsetkishin tómendetedi.
Máselen, jyl basynan beri indet juqtyrý deregi 142 mektepte tirkelgen. Kovıdke shaldyqqan 392 oqýshynyń 314- i sabaq kezinde juqtyrǵan. Al, 78-i jazǵy demalysta aýyrǵandar. 214 synyp 14 kúndik karantınge jabylǵan. Aıta keteıik, qazir óńirde myńǵa jýyq mektep bar.
«Oblysta 150 ekpe pýnkti, 80 jyljymaly brıgada bar. Sol 80 brıgada erteńgi kúni qaı mektep daıyn dese, keste boıynsha sol mektepke barady. Mamandandyrylǵan ári ruqsatnamasy bar medbıkeler sol mekteptepterde vaksına salady. Al, endi ata-anasy mektepke emes, emhanaǵa aparamyn dese apara alady. Ol - ózderiniń quqyǵy», deıdi oblystyq qoǵamdyq densaýlyq basqarmasynyń basshysy Nurhan Nurymbetova.
Pfizer ekpesi sondaı-aq, júktiliktiń 16 aptasynan bastap 37 aptasyna deıin, laktasııa kezeńindegi áıelderde – bosanǵannan keıingi kezeń aıaqtalǵannan keıin salynady. Búgingi tańǵa deıin óńirde osy toptaǵy 600-den asa áıel vaksına qabyldaýǵa ótinish bildirgen.
«Ekpe dozasy muzdatqysh qurylǵylarda -60-tan -90 gradýsqa deıingi temperatýra rejıminde qoımada saqtalady. 12 jastan 18 jasqa deıingi jasóspirimderdi vaksınalaý bilim uıymdarynyń egý bólmelerinde jáne emhanalarda júrgiziledi», dedi oblystyń bas sanıtarııa dárigeriniń orynbasary Baqtyoraz Elemesov.
