Osydan 80 jyl buryn, 1941 jyldyń qarashasynda teatr jańa ǵımaratqa qol jetkizdi. Búginde shahardyń eń kórikti aýdanynda asqaqtap turǵan óner oshaǵy Almatydaǵy biregeı sáýlet eskertkishteriniń tobyna kiredi. Eýropa arhıtektýrasy úlgisinde salynǵan klassıkalyq óner oshaǵy kóptiń kóńil tórinde eń aldymen osy eńseli ǵımaratymen qonaqtap qalǵan. Opera men balet óneriniń qalyptasyp, qanat jaıýyna baılanysty teatr damýynyń ártúrli kezeńderinde onyń aıdentıkasy da ózgerip otyrdy. Zamana ózgerisine oraı ártúrli aıdentıkany ýaqyt rýhyna sáıkes keletin biryńǵaı stılge baǵyndyrý jáne onyń belgisinde teatrdyń baı murasyn kórsetý máselesiniń týyndaýy – qalypty zańdylyq.
«Abaı atyndaǵy Qazaq ulttyq opera jáne balet teatry – alǵashqy qazaq operalary men baletteriniń besigi, ártisterdiń, kompozıtorlardyń, dırıjerlerdiń, sýretshiler men rejısserlerdiń almamateri bolyp tabylatyn Qazaqstannyń kásibı mýzykalyq óneriniń naǵyz sımvoly. Alǵash HH ǵasyrdyń 30-jyldary mýzykalyq stýdııa retinde paıda bolǵan Abaı atyndaǵy Qazaq ulttyq opera jáne balet teatry bıyl 88-maýsymynyń shymyldyǵyn túrdi. Teatr birtindep júzjyldyq mereıtoıyna qaraı qadam basyp keledi. 1941 jyly teatr óziniń jeke ǵımaratyn alǵannan keıin óner ordasy úshin mańyzdy sanalatyn «akademııalyq» mártebege ıe boldy. Búgin, 80 jyldan keıin Abaı atyndaǵy QazUOBT óziniń tarıhı ǵımaratynda jańa «Ulttyq» mártebesin ıelendi. О́mir bir orynda turmaıdy, biz belsendi túrde alǵa jyljı beremiz jáne ýaqytqa saı damyp otyrýdy murat tutamyz», – deıdi teatr dırektory mindetin atqarýshy Taır Qarataev.
2021 jyly Qazaqstan Respýblıkasy Úkimetiniń qaýlysymen teatr Abaı atyndaǵy Qazaq ulttyq opera jáne balet teatry bolyp qaıta ataldy. Teatr ómirindegi bul mańyzdy oqıǵa vızýaldy stıldi ózgertýge túrtki boldy, endi elimizdiń bas teatrynda ǵımarattyń biregeı sáýletin basa kórsetý arqyly tarıhqa tuspal jasaǵan jańa zamanaýı logotıp paıda boldy. О́nerdegi osy eleýli oqıǵaǵa oraı uıymdastyrylǵan baspasóz máslıhatynda sóz alǵan Qazaqstannyń eńbek sińirgen ártisi Shahmardan Ábilov, balet trýppasynyń jetekshisi Gúljan Tútkibaeva teatrdyń ótken kúninen qyzyqty syr shertip, tarıhty jańasha bezbendegen logotıp úshin júrekjardy qýanyshyn bildirdi.
Logotıp qyzyl jáne qara tústen turady. Sebebi teatr tarıhyna kóz júgirtsek, alpys, jetpis jyl burynǵy spektakl afıshalary osy eki túste ǵana daıyndalatyn. Al ABAY degen jazý uly shaıyrdyń alǵashqy óleńderi basylyp shyqqan baspanyń arabsha stıldegi ırek qarpiniń úlgisimen úılestire tańdalǵan. Teatrdyń ulttyq mańyzy eskerile otyryp, jańa logotıp ózeginen eski tarıhqa qurmet osyndaı izdenistermen baıytylyp, kórinis tabady. «Jumys bir jarym jylǵa sozyldy: biz muraǵat materıaldaryn tynymsyz zerdeledik, kóptegen eski afısha men jazbany aqtardyq, dızaınerlerimiz ǵımarattyń sáýletin kirpishine deıin zerttep, teatrdyń ár buryshyn sýretke túsirdik», deıdi óz jumysynyń qyr-syrymen tanystyrǵan SEED agenttiginiń kreatıvti dırektory Naıl Mýratov. Sonymen qatar taǵy bir mindet ǵımarattyń biregeıligi men sulýlyǵyn, onyń ulttyq erekshelikterin jetkizý boldy – teatr jıi gastrolge shyǵady, sondyqtan logotıpti sheteldik qaýymnyń qabyldaýyna sáıkestendirý mańyzdy boldy. Sóıtip ǵımarattyń syrtqy ǵana emes, sonymen qatar ishki sáýlettik bólshekterinen shabyt alatyn ádemi sheshim tabyldy. Ǵımarattyń ishki erekshelikteri saýsaq izderi sııaqty, ár detali sheberdiń qaıtalanbaıtyn qoltańbasymen kómkerilgeni belgili boldy. Dál osy arhıtektýralyq erekshelikter qoldan jazylǵan letterıngke negiz etip alyndy. Logotıptegi ár árip teatrdyń syzbasyn jetkizedi. Negizgi grafıkalyq element – bul teatrdyń ishki jáne syrtqy dızaınynda jıi qaıtalanatyn oıý elementi.
ALMATY
