«Ǵylym qory óziniń 15 jyldyǵyn atap ótip jatyr. Sońǵy eki jylda 130-ǵa jýyq joba qarjylandyryldy. Qor – ǵylymı jáne ǵylymı-tehnıkalyq qyzmet nátıjelerin kommersııalandyrýǵa arnalǵan jobalardy granttyq qarjylandyrý boıynsha operatory. Búgingi tańda biz 113 ǵylymdy qajetsinetin óndiristi iske qostyq, onyń 14-i ónim eksportyna shyǵaryldy. 1,5 myńǵa jýyq jumys orny quryldy. Zııatkerlik menshik avtorlary men ǵylymı ázirlemelerdi paıdalanatyn kásiporyndar arasynda 45 lısenzııalyq kelisim jasaldy», dep atap ótti Ǵylym qory basqarmasynyń tóraǵasy Aryn Orsarıev.
Iаdrolyq fızıka ınstıtýtynyń ǵalymdary kobalt-57 radıoaktıvti ızotopyn arzan baǵamen óndirýdiń jańa tehnologııasyn jasady. Bul ónim ıadrolyq medısınada, ǵylymı zertteýlerge arnalǵan quraldardy óndirýde medısınalyq tomograftardyń jumys isteý sapasyn baqylaý úshin qoldanylady. Joba kommersııalandyryldy jáne otandyq ǵalymdardyń tehnologııasy boıynsha kobalt-57 ızotopynyń eritindisi ónerkásip óndirisiniń kóleminde shyǵaryla bastady. Qazaqstandyq ónim halyqaralyq naryqqa shyǵyp, búginde kobalt radıoızotopy partııasy Reseıge jetkizilýde.
Memlekettik qoldaýdyń nátıjesinde qazaqstandyq ǵalymdar sheteldik ǵalymdarmen qatar medısına, nano jáne bıotehnologııa, jasandy ıntellekt, geologııa, mıneraldyq jáne kómirsýtekti shıkizatty qaıta óńdeý, aýyl sharýashylyǵy ónimderiniń qaýipsizdigi jáne ekologııa salalaryndaǵy zamanaýı ázirlemelerge qatysyp jatyr. Ǵylym qorynyń qoldaýymen elimizde jel jáne kún energııasyn óndiretin biregeı generatorlar óndirisi jolǵa qoıylǵan.
«Qondyrǵy syrtqy qýat kózin qosýdy qajet etpeıdi, negizgi jáne rezervtik qýat kózi retinde paıdalanylady. Sonymen qatar elektr jelisinen alys ornalasqan nysandardy qýatpen jabdyqtaý máselesin sheshýge múmkindik beredi. Jel generatorlary jelge, daýylǵa, muz qatýǵa, tómen temperatýraǵa tózimdi. Atalǵan generatorlardy jergilikti jerdiń geografııalyq jáne klımattyq erekshelikterine qaramastan paıdalanýǵa bolady. Qondyrǵylar úlken suranysqa ıe, búgingi tańda satylym kólemi 100 mln teńgeden asty», dedi joba jetekshisi Janbolat Muzbaev.
Mıkrobıologııa jáne vırýsologııa ınstıtýtynyń ǵalymdary zeńge qarsy «Rozeofýngın-AS» preparatyn oılap tapty. Jaqpa teri mıkozdaryn emdeýge arnalǵan jáne joǵary tıimdiligin kórsetti. Preparat biregeı quramymen jáne zeńge qarsy áser etý spektriniń keńdigimen erekshelenedi. «Rozeofýngın-AS» preparaty Dıagnostıkalaý men emdeýdiń klınıkalyq hattamasy dárileriniń tizimine jáne Qazaqstandyq ulttyq dárilik formýlıaryna kirdi.
