Departament basshysynyń birinshi orynbasary T.Serikbaevtyń aıtýyna qaraǵanda, tirkelgen qylmystardyń basym bóligin paraqorlyq jáne jymqyrý faktileri quraıdy. «Jymqyrý faktileri boıynsha – 17, paraqorlyq faktileri boıynsha 48 qylmys tirkelgen. Salalar boıynsha anyqtalǵan qylmystardyń eń kóp sany quqyq qorǵaý organdarynda – 20, bilim, densaýlyq saqtaý, qurylys salalarynda 12 qylmystan tirkeldi. Sondaı-aq sybaılas jemqorlyq jasaǵany úshin 51 jaýapty qyzmetker áshkerelenip, 16 adam sottaldy. Qylmystyq isterdi tergeý sheńberinde memlekettik organdarǵa 49 usynym engizilip, onyń 46-sy qaralǵan. Nátıjesinde, 24 laýazymdy tulǵa tártiptik jaýapkershilikke tartyldy, onyń ishinde 3 qyzmetker atqaryp otyrǵan laýazymynan bosatylsa, 5-ýi jumystan bosatyldy», dedi Talǵar Serikbaev sońǵy 10 aıda atqarylǵan jumystar boıynsha bergen aqparatynda. Sonymen qatar ol sybaılas jemqorlyqtyń aldyn alý baǵytynda azamattyq qoǵam ınstıtýttarymen tyǵyz ózara is-qımyl mańyzdy ról atqaratyndyǵyn málimdedi. Bul oraıda «Shymkent – adaldyq alańy», arnaıy monıtorıngtik top jáne aqparattyq-aǵartýshylyq shtaby tarapynan júzege asyrylǵan jobalar oń nátıje bergen. Megapolıs turǵyndaryna keńester beriletin Antikor Live jáne Adal Komek jobalary halyqty qyzyqtyratyn ózekti máselelerdi talqylaý boıynsha tıimdi dıalog alańyna aınalǵan. Jyl basynan beri departament 10 mekemeniń qyzmetine taldaý júrgizip, sybaılas jemqorlyq táýekelderi anyqtalǵan. Syrtqy taldaýlardyń qorytyndysy boıynsha 100-den asa usynys engizilip, olardyń jartysynan kóbi oryndaldy.
Sondaı-aq departament basshysynyń birinshi orynbasary búginde Shymkentte kvazımemlekettik sektordyń 186 uıymynda komplaens qyzmeti jumys isteıtinin aıtty. Jyl basynan beri ótinishteri boıynsha sybaılas jemqorlyq quqyq buzýshylyqtarynyń jolyn kesýge yqpal etken 12 adam kótermelenip, olardyń syıaqy mólsheri 2 mln teńgeden astam somany quraǵan.
