Bilekti de júrekti jastar synalar baıqaýǵa aýdandardyń kil myqtylary qatysty. Árbir jas sarbaz jeńiske umtyldy, kúshtilikterin, eptilikterin kórsetkisi keldi.
Jıynnyń shymyldyǵy «Týǵan jerim meniń – Qazaqstanym!» chellendj baıqaýymen túrildi. Saıys bolǵan soń biri súrinedi, endi biri babyna, baǵyna qaraı ony sátti aıaqtap jatady. Onyń bárin qazylar saraptap, saralap otyrdy. Al týrnıkke tartylýda, arqaǵa jatyp, deneni kóterýde sarbazdardyń kúshtileri irikteldi. AK-74 avtomatyn bólshektep, jınaqtaǵan sarbazdar eptilikterin shapshańdyqtaryn kórsetti. Baıqaý onlaın uıymdastyrylǵanymen, qyzyqty ótti.
– «Aıbyn» áskerı-patrıottyq jastar jıyny áskerı qyzmet bedelin, áskerı qyzmetshiniń mártebesin arttyrýǵa baǵyttalǵan biregeı is-shara. О́ńirlik saıystyń jeńimpazdarynan oblystyq qurama jasaqtalyp, 2022 jyly respýblıkalyq jıynda baqtaryn synaıdy, – deıdi Shyǵys Qazaqstan oblysy qorǵanys isteri jónindegi departamenti bastyǵynyń orynbasary Erlan Ramazanov.
Áskerı jıyndy uıymdastyrýshylardyń kózdegen maqsaty – jastardy patrıottyq baǵytta tárbıeleý, áskerı-patrıottyq klýbtardyń, «Jas Sarbaz» synyptarynyń jumystaryn jandandyrý. Sondaı-aq jastar arasynda salamatty ómir saltyn nasıhattaýdyń bir joly da osy.
Saıystyń qorytyndysy boıynsha, úshinshi oryndy Jarma aýdanynyń «Aq bóri» áskerı-patrıottyq klýbynyń komandasy, ekinshi oryndy Aıagóz aýdanynyń «Jas artıllerıst» áskerı-patrıottyq klýbynyń komandasy enshiledi. Al birinshi oryndy Rıdder qalasynyń «Suńqar» áskerı-patrıottyq klýbynyń komandasy qanjyǵaǵa bassa, bas júldeni Semeı qalasyna qarasty Bulaq aýylynyń «Aýyl arlandary» áskerı-patrıottyq klýbynyń komandasy jeńip aldy.
– «Áskerı-patrıottyq tárbıe berý jáne jastardy áskerı qyzmetke yntalandyrý jónindegi sharalar keshenin iske asyrý» jobasy aıasynda onlaın formattaǵy «Aıbyn» áskerı-patrıottyq jastar jıynyna oblystyń 15 qalasy men aýdanynan 75 jas baq synasty. Bul is-shara oblysta jyl saıyn jalǵasyn tabady, – dedi Shyǵys Qazaqstan oblysy ishki saıasat basqarmasy basshysynyń orynbasary Irına Smıt.
Jıyn oblystyq ishki saıasat basqarmasynyń memlekettik áleýmettik tapsyrysy aıasynda «Qazaqstan halyqaralyq quqyqtyq qarym-qatynas qory» qoǵamdyq qorynyń uıymdastyrýymen ótti. Saıysqa Qazaqstan Respýblıkasy Qorǵanys mınıstrligi Shyǵys Qazaqstan oblysynyń qorǵanys isteri jónindegi departamenti men oblystyq bilim basqarmasynyń qoldaýymen ótkizildi.
Shyǵys Qazaqstan oblysy
