Sharaǵa qatysýǵa 900-ge jýyq adam ótinim bildirgen. Qatysýshylardyń basym bóligi Shymkent jáne Nur-Sultan, Almaty, Túrkistan qalalarynan boldy. Olar saıystyń alǵashqy kúninde aldyn ala berilgen «Welcome to Shymkent» taqyrybynda qala týraly ımıdjdik jáne kreatıvti jarnamalyq beınerolıkter túsirdi. Daıyn beınerolıkterdi elimizde mobılografııa salasyn damytqan Qyran Talapbek bastaǵan komıssııa músheleri baǵalap, jeńimpazdar tizimin jarııalady. Jeńimpazdarǵa baǵaly syılyqtar tabystaldy.
Shara aıasynda ótken plenarlyq kezdesýge qala ákiminiń orynbasary Maqsut Isahov, О́rken Kenjebek, Syrymbek Taý, Aqbota Anýarbek jáne Ádilet Rahmetolla syndy birneshe madıa salasy men túrli baǵytta óz bastamalaryn damytyp júrgen áleýmettik jeli belsendileri qatysyp, kreatıvti ındýstrııa men mobılografııanyń týrızm salasyndaǵy róline toqtalyp ótti.
«Ulttyq kreatıvti damytý - zaman talabyna saı tendensııa ekenin eskere kele, Shymkent qalasyn elimizdegi iri kreatıvti habtardyń birine aınaldyrýdy qolǵa alyp otyrmyz. Osy baǵyttaǵy jumystyń bastamasy retinde Qazaqstanda alǵash ret respýblıkamyzdyń ár óńirinen talantty mobılograftardyń basyn qosyp, mobılografııa festıvalin uıymdastyrdyq. Bul sala kreatıvti ındýstrııanyń ajyramas bóligi bola otyryp, týrızmniń múmkindikterin jarnamalaýǵa taptyrmas qural. Bul bastamany áriqaraı jalǵastyryp, Shymkent qalasynda mobılograftardy biriktiretin jyl saıynǵy úrdiske aınaldyratyn bolamyz», dedi qala ákiminiń orynbasary Maqsut Isahov.
Eki kúnge sozylǵan is-sharada elimizdiń úshinshi megapolısi týraly sapaly beınerolıkter ázirlendi. Rolıkter aldaǵy ýaqytta jarnamany jandandyryp, týrısterdi tartý maqsatynda jarııalanyp otyrmaq. Jalpy elimizde sońǵy 3 jylda mobılografııa salasy damyp keledi. Oǵan qyzyǵýshy ári kásip etkender sany elý myńǵa jýyqtaǵan.
