Ulttyq epostyq jyr – «Alpamys batyr» dastany qaıshylyqqa toly qyzyqty sıýjetimen qatar, baqyt, erkindik pen týǵan jer úshin qazaq halqynyń kúresi hám mahabbatyn jyrlaıtyn úzdik shyǵarma. Al osynaý sıqyrly sóz áýezi sezim terber saz sarynymen jalǵanǵanda áser tipti erek. Sondyqtan bolsa kerek, týyndynyń birizdi mýzykalyq dramatýrgııasy shyǵarmashylyq toptyń kóńilin birden baýrapty.
– Sýretshilermen birge qoıylymnyń janryn fentezı dep tańdadyq. Tańǵajaıyp oqıǵalarmen jáne túrlenýlermen qatar sahnada shyn máninde shekspırlik qushtarlyq sharyqtaı túsedi. Mysaly, Taıshyq hannyń beınesi – óz qyzyn óltirgen adamnyń qasireti. Oryndaýshy bul kóriniske óte muqııat, jan-jaqty qaraýy tıis. Al Alpamysty óte romantıkalyq sıpattalǵan, tipti jan tebirenterlik keıipker dep te aıtar edim. Ol – qarýdy sheber ıgerýmen qatar, adal ári jan-tánimen súıetin adam. Súıikti jaýynger, súıikti batyr – bul da qazaqqa tán taqyryp. Meniń paıymdaýymsha, spektakl sana men emosııanyń birtutas aǵyny ispetti úzdiksiz ótýi tıis. Alpamys hıkaıasyndaǵy ertegi keıipkerleri – sıqyrshy Mystan, onyń uly janýar-adam Tazsha, qara kúshterdiń zalym qyzmetshileri – munyń barlyǵy mıfologııaǵa negizdelgenin umytpaý kerek. Bul jaǵynan kelgende qııal-ǵajaıyp kórinisterdiń Taıshyq hannyń sán-saltanatty saraılarymen qarama-qaıshylyǵy qyzyqty bolady degen senim mol, dep epostyq jyrdyń kórkemdik ereksheligine toqtalǵan rejısser odan ári operanyń mýzykalyq partıtýrasyna da aıryqsha nazar aýdardy: – Bul turǵydan Erkeǵalı Rahmadıevtiń mýzykasy ǵajap. Dramatýrgııalyq boıaýy qalyń áýezdi áýen kórermen júregine tereń boılaıdy dep esepteımin. Aldaǵy spektakldiń mańyzdy tezısi – Jer-Ana beınesine qazaq halqynyń barlyq qaıǵy-muńy men shattyǵy, erligi men kóz jasy, mahabbaty men arman-muraty biriktirilgen. Ol – spektakldiń qoıylýyna arqaý bolǵan barlyq kórinistiń sharyqtaý shegi. Jer-Ana qaza bolǵandardy joqtaıdy, batyrlaryn madaqtaıdy jáne jaýlaryn túp-tuńǵıyqqa áketip, jer qoınaýyna alyp, kózin qurtady. Sýretshilermen jumys barysynda biz tutas sahnany qamtıtyn osy beıneniń aýqymdylyǵyn kórsetýge tyrystyq, deıdi qoıýshy rejısser Iýrıı Aleksandrov premeraaldy daıyndyǵynyń shyǵarmashylyq qupııalarymen bólisip.
Osy tusta «Astana Opera» teatry óziniń basty maqsaty – repertýardy ulttyq opera óneriniń jaýharlarymen tolyqtyrý muratyn júzege asyrýdy jalǵastyryp kele jatqanyn aıryqsha atap ótken jón.
Dál qazir daıyndyq zaldarynda qoıylymǵa ázirlik qyzý júrip jatyr. Ásirese, ártisterdiń júrek tolqynysy erekshe. Batyrlyq pen kirshiksiz mahabbaty arqaý etken týyndyda Alpamys partııasyn Rasýl Jarmaǵambetov, Erjan Saıpov jáne Talǵat Ǵaleev saraptaıdy. Gúlbarshyn beınesi Jámıla Jarqymbaeva, Aıgúl Nııazova, Jannat Baqtaı, Aızada Qaponova bastaǵan ártisterdiń somdaýynda kórermenimen qaýyshpaq. Ana (Jer-Ana) – Tatıana Vısınskaıa, Saltanat Muratbekova, Taıshyq han – Shyńǵys Rasylhan, Janat Shybyqbaev, Bolat Esimhanov, Qarakóz – Saltanat Ahmetova men Ásem Sembına, Jyraý – Erlan Rysqalı, Haıdar Mustapın, Mystan – Bıbigúl Januzaq, Gúljanat Sapaqova, Keıqýat – Abylaı Beken, Álıhan Zeınolla, Qaraman – Beıimbet Tańaryqov, Ultan – Erulan Kámel, Ramzat Balakıshıev syndy saıdyń tasyndaı ánshilerdiń saraptaýynda sahnaǵa shyǵady dep kútilýde.
Sondaı-aq kórermenin uzaq kúttirgen áıgili batyrlyq týyndysynyń sahnaǵa shyǵýyna qoıýshy rejısser men akterlerden bólek, dırıjer – Qazaqstannyń eńbek sińirgen qaıratkeri Abzal Muhıtdın, rejısserdiń keńesshisi – Naılıa Rahmadıeva, bas hormeıster – Qazaqstannyń eńbek sińirgen qaıratkeri Erjan Dáýitov, ssenograftar jáne kostıýmder boıynsha sýretshiler – Qazaqstannyń eńbek sińirgen qaıratkerleri Sofıa Tasmaǵambetova men Pavel Dragýnov, horeograftar – Qazaqstannyń eńbek sińirgen qaıratkerleri Tursynbek Nurqalıev pen Ǵalııa Bóribaeva bastaǵan talantty shyǵarmashylyq quram talmaı eńbek etti.
