Ekologııa • 19 Qarasha, 2021

Balqash kóli Araldyń kebin kııýi múmkin

1853 ret

kórsetildi

2 mın

oqý úshin

Balqash deńgeıi 2040 jylǵa deıin aıtarlyqtaı taıazdanýy múmkin. Mundaı boljamdy QR Ekologııa, geologııa jáne tabıǵı resýrstar mınıstrligi mamandary aıtyp otyr, dep habarlaıdy Egemen.kz.

Gaýhar QAPASh

Vedomstvo Qytaıdaǵy sý qabyldaǵyshtardy eskere otyryp, kól deńgeıin modeldeý júrgizgen. Nátıjeler Balqash kóliniń deńgeıi 341 metr synı belgiden tómen túsetinin kórsetken.

«Balqash kóliniń taıazdanýynan jaǵymsyz saldarlar bolýy múmkin: sýly-batpaqty alqaptardyń qurǵaýy jáne joıylýy; jabaıy janýarlardyń qonys aýdarý joldarynyń joıylýy, ásirese sý mańyndaǵy janýarlardyń (úırekter men qazdar) qonys aýdarýynyń ózgerýi, bul olardyń tarıhı kóshi-qon baǵyttaryn ózgertedi; klımattyń ózgerýi; aımaqtyń florasy men faýnasynyń joǵalýy; búkil kól júıesiniń joıylýy; Balqash kóliniń batys tushy bóliginiń tuzdanýy jańa jerlerde ómir súretin balyqtardyń kóptegen túriniń joıylýyna ákelýi múmkin», dep eskertti Ekologııa, geologııa jáne tabıǵı resýrstar mınıstrligi mamandary.

Munyń bári janýarlardyń joıylý qaýpine aınalýy múmkin. Máselen, Balqash óńirinde qustardyń 120 túri mekendeıdi, onyń 12 túri Qyzyl kitapqa engizilgen. Munda jolbarysty reıntrodýksııalaý da josparlanǵan. Sondaı-aq, aýyl sharýashylyǵyn sýmen qamtamasyz etý máselesi ýshyǵýy múmkin.

«Máselege baılanysty basqarma Balqash kólin saqtaý josparyn bekitti. Sýarmaly sýmen qamtamasyz etý úshin «Qazvodhoz»mamandary úlken jumystar atqaryp jatyr. Sheńgeldi massıvin aýyz sýmen jáne sýarmaly sýmen qamtamasyz etý úshin qosymsha sý qubyry tartyldy, uzyndyǵy 1,5 shaqyrym kanal-qubyr salyndy. Sondaı-aq, Ile atyraýyndaǵy sýdy tutyný kólemin jylyna 1 kılometr tekshege deıin azaıtý úshin Ileniń tómengi aǵysynda sý elektr stansııasynan shamamen 25 shaqyrym qashyqta «Kerbulaq» qurylysy salynady. Syıymdylyǵy 100 mıllıon tekshe metrden aspaıtyn qarsy retteýshi sý qoımasy negizinen ózen arnasynda ornalasady. Kerbulaq qarsy rettegishi salynǵannan keıin ózen saǵasyn abattandyrý boıynsha sýarý jáne drenaj jumystaryn júrgizý múmkin bolady, bul ony arnalyq fazada ustap turýǵa jáne onyń sý tutyný kólemin jylyna 1 tekshe shaqyrymǵa deıin azaıtýǵa múmkindik beredi», dedi mınıstrlik mamandary.