Bul elimizde ashylyp otyrǵan birinshi ortalyq.
Ortalyqtyń ashylýy issharasyna QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Lázzat Ramazanova, Ulttyq ekonomıka vıse-mınıstri Álisher Ábdiqadyrov, Túrkistan oblysynyń ákimi orynbasary Arman Jetpisbaev,«Atameken» Ulttyq kásipkerler palatasynyń Basqarma tóraǵasy orynbasary Oljas Ordabaev qatysty, halyqaralyq uıymdardyń, dıplomatııalyq korpýstyń ókilderi.
Aıtýly isshara Qazaqstan Respýblıkasy Táýelsizdiginiń 30-jyldyǵy jáne Áıelder kásipkerliginiń halyqaralyq kúnine oraı uıymdastyryldy.
Mundaı ortalyqtardy ashý Nur Otan partııasynyń saılaýaldy baǵdarlamasynda qarastyrylǵan, sondaı-aq el prezıdenti Qasym-Jomart Toqaev «Áıelderdiń ekonomıkalyq múmkindikterin arttyrý sharalary men quraldary» atty bıyl 3 naýryzda ótken sarapshylar otyrysynda ortalyqtardy qurýdyń qajettiligi jaıly atap ótken bolatyn. Bul bastamany júzege asyrý maqsatynda QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa, Ulttyq ekonomıka mınıstrligi jáne QR «Atameken» ulttyq kásipkerler palatasy elimizdiń barlyq óńirinde 17 ortalyq ashý týraly kelisimge qol qoıylǵan bolatyn.
Qoldaý ortalyqtary arqyly kásibin dóńgeletip otyrǵan isker hanymdar men jeke kásipti qolǵa alǵan qyz-kelinshekterge qarjylaı emes barlyq qyzmettúrlerinen qoldaý kórsetilip, jeke bıznes jobalardy iske asyrýdapraktıkalyq kómek túrleri usynylatyn bolady. Onymen qosa oqytý trenıngteri men master-klasstar uıymdastyrý, jeńildetilgen nesıe berý baǵdarlamalaryna, kooperatıvtik qozǵalystarǵa tartý, daıyn ónimderdi naryqqa ótkizý aıasyn keńeıtý jaǵynan kómek kórsetý kózdelgen.
Ulttyq komıssııa tóraıymy Lázzat Ramazanova birinshi ortalyqtyń ashylý saltanatynda sóılegen sózinde bul ortalyqtyń óńirdiń ekonomıkalyq áleýetin nyǵaıtýǵa jáne jalpy otbasylardyń ál-aýqatyn jaqsartýǵa septigin tıgizetinin atap ótti.
«Qyz-kelinshekter kez kelgen súıikti isin tabys kózine aınaldyryp, otbasynyń bıýdjetin molaıta alatynyn tájirıbeden kórip otyrmyz. Dese de kóp jaǵdaıda jeke kásipti ashýǵa bilimi jetkiliksiz bolyp jatady, keıdeyntalandyrý jetispese, endi birine kásipti bastaǵan alǵashqy kezeńderde qoldaý jetispeı jatady. О́ńirlerdegi qoldaý ortalyqtary qajetti biliktilik pen praktıkalyq turǵydan kómek kórsetetin ortaq alań bolýy tıis. Tabys tabýdy úırengisi kelgen kez kelgen qyz-kelinshek, aýyldardan bolsa da, bul ortalyqtarda tek keńes alyp qoımaı, is júzinde qoldaý men kómek alatynyn sezinetin bolady. Ortalyqtar qyz-kelinshekterdiń ekonomıkalyq múmkindikterin arttyryp qana qoımaı, jalpy óńirdiń ekonomıkasyn kúsheıte túsetinine senimimiz mol», dedi Ulttyq komıssııa tóraıymy Lázzat Ramazanova.
Ortalyqtardy ashýǵa qajetti qarajat «COVID-19 indetine qarsy kúrestegiyntymaqtastyq qory» jobasy aıasynda Azııa damý banki men BUU damý baǵdarlamasynyń birlesken qarajaty esebinen bólinedi. Sondaı-aq «Atameken» UKP janyndaǵy Isker áıelder keńesiniń músheleri qyz-kelinshekterge jetekshi retinde qoldaý kórsetetin bolady. Al «BUU-Áıelder» Qurylymy ortalyqtarǵa qajetti ádistemelik qoldaýdy qamtamasyz etip, ortalyq qyzmetkerlerin oqytý, ádistemelik súıemeldeý, keıinnen qyz-kelinshekterdiń óndirgen ónimderin naryqqa ótkizýge arnalǵan ınternet-portaldy ázirleý isin júzege asyrmaq.
Birinshi kezeńde Áıelder kásipkerligin qoldaý ortalyqtary Túrkistan oblysy, Almaty oblysy jáne Mańǵystaý oblysynda ashylady. Al elimizdiń qalǵan óńirlerinde mundaı ortalyqtar 2022 jyldyń naýryz aıynan bastap ashylatyn bolady.
