Mádenıet jáne sport mınıstrliginiń bastamasymen qanat qaqqan joba el aımaqtarynan kelgen jıyrmaǵa tarta jas mýzykantty Almatyǵa shaqyrdy. Olardyń ishinde jeke oryndaýshylarmen qatar óner toptary da bar. О́nerge endi qadam basqan jas mýzykanttar «Jyr alyby – Jambyl» respýblıkalyq festıvalinde óner kórsetip, kópshiliktiń alǵysyna bólendi. Aqyn týǵan mekenge ańsary aýyp kelgen jetkinshekter eń aldymen Dostyq dańǵylynyń boıyndaǵy Jambyl ata eskertkishine gúl shoqtaryn qoıyp, rýhyna taǵzym etti.
– Jańa joba otandyq hıp-hop ındýstrııanyń eń úzdik talantty ókilderin bir shyǵarmashylyq alańda toǵystyryp otyr. Qatysýshylar Instagram, YouTube, Facebook áleýmettik jelileri arqyly irikteldi. Irikteý kezinde ónerpazdardyń ártistik sheberligine, sóz saptaýyna, mátin ıdeıasynyń ereksheligine, vokaldyq qabiletterine basa mán berildi. Qatysýshylar arasynda Qazaqstan halqy assambleıasynyń etnomádenı birlestikteri ókilderi: orys, belorýs, ózbek, uıǵyr jáne basqa etnostar bar. Jobanyń maqsaty – Jambyl murasyn nasıhattaı otyryp, jas talanttardy qoldaý ári el aımaqtary arasynda kásibı-shyǵarmashylyq baılanysty nyǵaıtý. Basqa óńirlerden kelgen jastar úshin Alataý baýraıy Jambyl aqyn týǵan meken retinde ystyq. Sondyqtan festıval qatysýshylaryn aqyn eskertkishine ákeldik, – deıdi jobany úılestirýshilerdiń biri Sáýle Isabekova.
Uıymdastyrýshylardyń aıtýynsha, kezinde Jambyl jyrlaǵan ózekti taqyryptardy búginde qazaqstandyq jas reperler kóterip, jańa formatta usynýda. Sondyqtan aqynnyń týyndylary áli kúnge deıin ózektiligin joǵaltpady. Joba aıasynda jastar arasynda tanymal Kyle Ruh, Ziruza, Ray, Nei1tron, Madi Rymbaev, Soulbirkez, Esko syndy jastar óner kórsetip, ónerdegi óz jetistikterimen bólisti.
Halyq poezııasyndaǵy jańa órleý Jambyl poezııasymen tyǵyz baılanysty. Almatyda aqyn shyǵarmashylyǵyna jastardyń yntasyn oıatyp, qyzyǵýshylyǵyn arttyrýdy, jyr alybynyń baǵa jetpes ulttyq murasy arqyly halyqtyń rýhanı deńgeıin damytýdy kózdegen aýqymdy jobalar jyl basynan beri jalǵasýda. О́ner ókilderiniń qatysýymen uly aqynnyń týyndylaryn mýzykalyq-poetıkalyq jáne teatrlandyrylǵan is-sharalar formatynda usynǵan jobalar kópshiliktiń yqylasyna bólendi.
Aıtalyq, Á. Qasteev atyndaǵy óner mýzeıinde «Baqyt týraly jyr» atty mereıtoılyq kórme esik ashyp, ǵıbratty ǵumyr ıesiniń ómir órneginen syr shertetin kórmege óner mýzeıiniń qorynda saqtalǵan 30-dan astam keskindemelik, grafıkalyq jáne músindik týyndylar qoıylǵan bolatyn. Sonymen birge aqyn esimin ıemdengen Jambyl atyndaǵy Qazaq memlekettik fılarmonııasynyń bastamasymen birqatar aýqymdy is-sharalar keń óris tapty.
