AQSh-tyń Las-Vegas qalasyndaǵy Michelob ULTRA Arena-da ótken boks keshinde sharshy alańǵa kóterilgen Jánibek Álimhanuly orta salmaqtaǵy burynǵy álem chempıony, shyqqan tegi kamerýndyq, biraq Fransııa azamattyǵyn alǵan Hassan N’Dam N’Jıkammen judyryqtasyp, 8-raýndta tehnıkalyq nokaýtpen jeńiske jetti.
Kezdesý bastala sala rıng qojaıyny kim ekenin ańǵartqan otandasymyz ardager boksshyny «á» degennen abdyratyp qoıdy. Sharshy alańnyń burysh-buryshyna qashyp júrip judyryqtasqan Hassan qalaı soqqy jasaımyn dep emes, raýnd boıy qalaı qorǵansam eken dep bas qatyrýmen boldy. Rıngte ózin erkin sezingen Jánibek úshinshi raýndta buryshqa qaraı umtyla bergen qarsylasyn ortaǵa shaqyryp, jigittershe aıqasýdy usyndy. Ashyq boks kezinde táýir soqqy jasaıtyn qandasymyz ońtaıly sátti tıimdi paıdalanyp, fransııalyq boksshyny nokdaýnǵa jiberdi. Tez esin jıyp úlgergen Hassan tóreshige kezdesýdi ári qaraı jalǵastyrýǵa nıetti ekenin aıtty.
Qarsylasynyń áleýeti belgili bolǵannan keıin Jánibek joıqyn soqqylaryn azaıtyp, jankúıerler úshin jekpe-jekti sozýǵa tyrysty. Biraq Hassannyń shamasy tek 8-raýndqa deıin jetti. Bul úsh mınýttyqta N’Jıkamnyń murnynan qan, aıaǵynan ál kete bastaǵan edi. Sony baıqaǵan tóreshi Jánibektiń kezekti serııaly soqqysynan keıin jekpe-jekti toqtatýǵa májbúr boldy. Tehnıkalyq nokaýt!
Osylaısha, 28 jastaǵy qazaqstandyq boksshy kásipqoı bokstaǵy 11-jeńisine qol jetkizip, ózine tıesili WBO Global belbeýin sátti qorǵady. Sonymen qatar Jánibek WBC Continental tıtýlynyń ıegeri sanalady. 37 jastaǵy N’Jıkam osymen altynshy márte jeńildi.
Al Germanııanyń Gambýrg qalasynda ótken boks keshinde óner kórsetken aýyr salmaqtaǵy qazaqstandyq Jan Kosobýskıı de domınıkandyq qarsylasy Aleksıs Garsııany tehnıkalyq nokaýtpen jeńdi. On raýndqa eseptelgen aıqas besinshi raýndta aıaqtaldy. Otandasymyz alǵash A.Garsııany tórtinshi raýndta nokdaýnǵa túsirse, besinshi raýndta tehnıkalyq nokaýtpen jeńdi.
Buǵan deıin WBA International tıtýlyna ıe bolǵan Kosobýskıı osy jeńisiniń arqasynda WBC International Silver belbeýin de ıelendi.
