Demalys ornyna kireberis qaqpanyń mańdaıshasyndaǵy tý tústes kók taqtaıshada iri áriptermen ádiptelgen «Ult rýhy» degen jazý anadaıdan kórinedi. Alleıanyń qaq ortasynda dombyranyń músini ornalasqan. Onyń aınalasyna qoıylǵan on oryndyqtyń tórteýine kúnniń kózinen qýat alatyn panelder ornatylǵan. Mundaı smart-qurylǵylar turǵyndardyń uıaly telefondaryn qýattap alýyna jáne WIFI jelisine qosylýyna múmkindik beredi. Jańa alleıa túni boıy jap-jaryq bolyp turady, munda ornatylǵan 10 shaqty baǵana shamy qas qaraıa bere avtomatty túrde qosylady.
Táýelsizdik alleıasynyń ashylý saltanatyna jergilikti ardagerler keńesiniń ókilderi, aýdan ákiminiń orynbasary Nazgúl Manasova, «Varvarınsk» AQ-tyń atqarýshy dırektory Vladımır Efremenko, memlekettik qyzmetshiler men Táýelsizdik jyly dúnıege kelgen jastar qatysty. Shara barysynda ákim orynbasary Tobyl turǵyndaryn jańa demalys ornynyń ashylýymen quttyqtap, toǵyz joldyń torabynda jatqan kentti abattandyrýǵa úles qosqan kásipkerlerge alǵys aıtty.
– Qasıetti Táýelsizdigimizdiń 30 jyldyǵyna oraı búgin turǵyndar ıgiligine berilip jatqan «Ult rýhy» demalys alańy aýdanymyzdaǵy iri kásiporyndardyń kómegimen abattandyryldy. «Elý jylda el jańa» demekshi, elimiz táýelsizdikke ıe bolǵan 30 jyl ishinde bizdiń aýdanymyzda da kóptegen ıgi is atqaryldy. Aýdanymyzǵa qazaq jazba ádebıetiniń bastaýynda turǵan uly jazýshy, jerlesimiz ári maqtanyshymyz Beıimbet Maılın atamyzdyń esimi berilgenine de kóp bola qoıǵan joq. Aýdanymyz kóz aldymyzda kóktep keledi. Jyl saıyn joldar jóndelip, trotýarlar tóselýde, kóptegen áleýmettik joba júzege asyrylyp jatyr. Osynyń bári birligimiz ben eldigimizdiń, táýelsizdigimizdiń jemisi, – dedi N.Manasova.
Qostanaı oblysy
