Is-sharaǵa Shymkent garnızonynyń áskerı bólim komandırleri men mekeme bastyqtary, sondaı-aq ardagerler qoǵamdyq birlestikteriniń tóraǵalary qatysty.
Rásimde «Qarýly Kúshterdiń ardagerleri» Respýblıkalyq qoǵamdyq birlestigi tóraǵasynyń orynbasary general-maıor Marat Naǵymanov Shymkent qalasy fılıalynyń tóraǵasy zapastaǵy polkovnık Serikbaı Onbaevqa birlestiktiń qurylǵanyna 10 jyl tolýy jáne el Táýelsizdiginiń 30 jyldyǵy qarsańynda jastardy áskerı-patrıottyqqa tárbıeleýde atqarǵan jumystaryn oń baǵalap, birlestiktiń týyn saltanatty túrde tabys etti.
«10 jyl ishinde birlestik Qarýly Kúshterdiń kóptegen quramymen, bólimimen, Qorǵanys mınıstrligi departamentterimen tyǵyz baılanys ornatty. Ardagerler Qarýly Kúshterdiń barlyq áleýmettik mańyzy bar sharalaryna qatysty. Olar áskerge shaqyrylý aldyndaǵy jáne ásker qataryna shaqyrylatyn jastarmen kezdesýler ótkizip, joǵary oqý oryndarynda, kolledjderde, orta jáne arnaıy mektepterde tálim tárbıe kórsetti. Jastarmen jaqyn qarym-qatynas ornatyp, olardyń boıynda elimizdiń tarıhyna degen maqtanysh sezimin qalyptastyrýǵa atsalysty jáne áskerı mamandyqqa degen qyzyǵýshylyqtaryn oıatty», dedi general-maıor Marat Naǵymanov óz sózinde.
