Nur-Sultan qalasy PD esirtki qylmysyna qarsy is-qımyl bólimshesiniń jedel qyzmetkerleri Telegram messendjerinde tórt jasyryn ınternet-dúkenniń ákimshisi bolǵan jáne qala aýmaǵynda sıntetıkalyq esirtkini ózi satqan jergilikti turǵyndy ustady.
Polisia.kz saıtynyń málimetinshe, kúdikti «Refleks» arnaıy operasııasy aıasynda ustalǵan adamdar tobynyń áleýmettik jelilerdiń baılanystary men akkaýnttaryn zerdeleý kezinde polısııanyń nazaryna ilikken. Ustalǵan kezde odan bes bank kartasy, úsh uıaly telefon tárkilendi.
Ustalǵan azamattyń páterindegi seıfte mefedron esirtki zaty salynǵan 64 túıinshek, satýǵa daıyndalǵan 28 MDMA tabletkasy, sondaı-aq úsh elektrondyq tarazy, 10 mln teńge jáne 23 myń AQSh dollary somasyndaǵy qaptama materıaly men aqsha tabyldy.
Sonymen qatar Kravsov kóshesinde esirtki satýshymen baılanysta bolǵan 24 jastaǵy qyz ustaldy. Onyń jaldamaly páterinen ótkizý úshin daıyndalǵan mefedronnyń 36 túıini men esirtkini ólshep-oraýǵa arnalǵan qurylǵylar tárkilendi. Ol Sembınov kóshesindegi úıdiń aýlasynda jasaǵan bes betbelgi joıyldy.
Elordalyq esirtki polıseıleriniń jedel jumysynyń nátıjesinde qala aýmaǵynda esirtki satatyn tórt ınternet-dúkenniń qyzmeti anyqtalyp, joıyldy. Sıntetıkalyq psıhobelsendi zat – mefedronnyń 200-ge jýyq bir rettik dozasy tárkilendi.
Atalǵan faktiler boıynsha QR QK 297-baby 3-bóligi «Esirtki zattaryn ótkizý maqsatynda zańsyz daıyndaý, satyp alý, saqtaý ne adamdar tobynyń aldyn ala sóz baılasýy boıynsha ótkizý» boıynsha qylmystyq ister qozǵaldy, ol múliktiń tárkilenýimen 10 jyldan 25 jylǵa deıingi bas bostandyǵynan aıyrýǵa qylmystyq jaýapkershilikti kózdeıdi. Ustalǵandarǵa esirtki ınternet-dúkenderin ákimshilendirý boıynsha quqyqtyq baǵa sotqa deıingi is júrgizý barysynda beriletin bolady.
