Jýyrda Ystanbulda Win Eurasia halyqaralyq kórmesi uıymdastyryldy. Atalǵan sharaǵa Qazaqstannan arnaıy delegasııa baryp qatysty. Otandastarymyz kórme aıasynda túrkııalyq jáne ózge de memleketterdiń mashına jasaý salasyndaǵy kásiporyndary ókilderimen kezdesti. Bizdiń taraptan bul sharaǵa Qazaqstan mashına jasaýshylar odaǵynyń basqarma tóraǵasy M.Pishembaev, Maker jáne «Astana elektrtehnıkalyq zaýyty» kásiporyndarynyń basshylary, Kazakh Invest ulttyq kompanııasynyń ókilderi qatysty.
Qazaqstan mashına jasaýshylar odaǵynyń baspasóz qyzmeti habarlaǵandaı, bizdiń delegasııa Túrkııa mashına jasaý federasııasy (MAKFED) dırektorlar keńesiniń tóraǵasy Adnan Dalgakıranmen, sondaı-aq belgili mashına jasaý kásiporyndarynyń basshylarymen kezdesýler ótkizgen.
– Kezdesý barysynda Qazaqstan men Túrkııa arasyndaǵy ekonomıkalyq baılanystardy damytýǵa baǵyttalǵan mashına jasaýdaǵy yntymaqtastyq máseleleri talqylandy. Túrkııalyq áriptesterge Qazaqstannyń mashına jasaý salasyndaǵy óndiris kóleminiń jyl ótken saıyn artyp kele jatqany baıandaldy. Sondaı-aq ımport kólemi týraly aqparat berildi. 2020 jyly Qazaqstannyń ımporty 38 mlrd dollarǵa teń boldy. Onyń 17 mlrd dollary mashına jasaý ónimderiniń ımportyna tıesili. Bul eldegi jalpy ımport kóleminiń 45 paıyzyn quraıdy. Salada suranys bar. Sondyqtan damý men ınvestısııalyq yntymaqtastyqtyń áleýeti de joǵary, – dedi Meıram Pishembaev.
Budan bólek qazaqstandyq delegasııa kezdesýge qatysýshylarǵa ónerkásiptik kooperasııanyń perspektıvalary, munaı-gaz jáne taý-ken metallýrgııadaǵy mashına jasaýdyń ózara tıimdi yntymaqtastyǵy týraly baıandady.
– Biz sheteldik ınvestorlardy ozyq tehnologııalar men quzyretterdi transfertteýge, Qazaqstannyń jáne bolashaqta Eýrazııalyq ekonomıkalyq odaqqa múshe elderdiń naryǵyn birlesip damytýǵa shaqyramyz, – deıdi Qazaqstan mashına jasaýshylar odaǵynyń basqarma tóraǵasy.
MAKFED dırektorlar keńesiniń tóraǵasy Adnan Dalgakıran Qazaqstandy baýyrlas el ári Túrkııanyń negizgi seriktesi sanaıtynyn, sondyqtan Qazaqstanda áleýetti jobalardy iske asyrý múmkindikterin pysyqtaýǵa ázir ekenin jetkizdi. О́z kezeginde qazaqstandyq delegasııa sheteldik áriptesterin keler jyly ótetin Qazaqstan mashına jasaýshylarynyń H forýmyna jáne halyqaralyq Kazakhstan Machinery Fair-2022 mashına jasaý jáne metall óńdeý mamandandyrylǵan kórmesine qatysýǵa shaqyrdy.
Kelissózder nátıjesinde Maker JShS-niń basqarma tóraǵasy J.Baıǵabylov Túrkııanyń Okerel jáne Pres-San kompanııalarymen memorandýmǵa qol qoıdy. Bul kelisim bıznestiń jańa uzaq merzimdi seriktestik qatynastaryn ornatýǵa, sondaı-aq Qazaqstan men Túrkııanyń mashına jasaý salasyndaǵy kásiporyndarymen birlesken jobalardy júzege asyrýǵa baǵyttalǵan.
