Qazyna qattalǵan ortalyq

Arhıv mamandary úshin aıtýly merekede Prezıdent Qasym-Jomart Toqaevtyń quttyqtaý haty oqyldy. «100 jyldyq tarıhynda Ortalyq memlekettik arhıv álemdegi eń iri arhıvterdiń birine aınaldy, ol eń baı jáne qaıtalanbas tarıhı qujattardy biriktire aldy, ózindik damý joly men ishki dástúrin qalyptastyrdy. Osy oraıda arhıv qyzmetkerleriniń baǵa jetpes úlesi men eńbegi laıyqty baǵalanýǵa tıis. Bul baǵytta mınıstrlik birqatar jumys atqardy. Qazaqstan Res-­
p­ýb­lıkasy Táýelsizdiginiń 30 jyl­dyǵyna oraı alǵash ret 100-den astam arhıv qyzmetkeri «Arhıv salasynyń úzdigi» vedomstvolyq nagradasyna ıe boldy. Sondaı-aq 22 jeltoqsanda alǵash ret kásibı mereke «Arhıvshi kúnin» atap ótemiz», delingen qut­tyqtaýda.

Saltanatty shara barysynda Mádenıet jáne sport mınıstri Aqtoty Raıymqulova muraǵat mamandaryn osy aıtýly kúnmen quttyqtap, «Kez kelgen memleket úshin arhıv qyzmetiniń strategııalyq mańyzy bar. Aqparattyq tehnologııalardy damytý nátıjesinde búgingi tańda arhıv kózderi ulttyq resýrstardyń biri jáne ulttyq bi­regeılikti tárbıeleýdiń mańyzdy kózi ekeni anyq. Sondaı-aq tuǵyr­ly Táýelsizdigimizdiń 30 jyldyǵyn atap ótýdiń negizgi tujyrymda­ma­sy jyl basynda jaryq kórgen Mem­le­ket basshysy Qasym-Jomart Toqaev­tyń «Táýelsizdik bárinen qym­bat» maqa­lasynda jan-jaqty atap kór­setildi. Osy oraıda Qazaqstan Respýblıkasynyń Tuńǵysh Prezıdenti – Elbasy Nursultan Nazar­baev arhıv salasy týraly: «Arhıv – qaǵaz qoımasy emes, nár berýshi káýsar bulaq», dep atap ótken bolatyn. Sondyqtan da bul aıtýly mereke – barsha halqymyzdyń merekesi», dedi mınıstr. Osy oraıda vedomstvo basshysy birqatar arhıv salasynyń qyzmetkerin «Arhıv salasynyń úzdigi» tósbelgisimen jáne «Qazaqstan Respýblıkasynyń ortalyq memlekettik arhıvine-100 jyl» mereıtoılyq medalimen marapattady.

Bútindeı bir halyqtyń ótkenin qujattyq derektermen jınaqtap, ulttyń qazynasy retinde saqtap otyrǵan tarıhı shejire qoımasynyń ótkeni men búgini jaıynda aıtyp ótken Mádenıet jáne sport vıse-mınıstri Nurǵısa Dáýeshov: «Táýelsizdiktiń 30 jyldyǵy men Ulttyq arhıvtiń 100 jyldyǵyn qa­tar atap ótý elimiz tarıhyndaǵy aıtýly mereke ǵana emes, onyń keleshek urpaq úshin rýhanı qundylyǵy joǵary», dep atap ótse, Ortalyq memlekettik arhıv dırektory Sábıt Shildebaı: «Memlekettiligimizdiń qujattyq negizi bolyp tabylatyn arhıv qujattardy saqtap, ǵylymı eńbekterdi jarııalap qana qoımaı, bolashaqta ǵylymı ortalyqqa aınalýy kerek. Aldaǵy ýaqytta osy baǵytta jumys isteýdi josparlap otyrmyz», dep atap ótti. Al munda saqtalǵan qujattar tarıhı sanasy qalyptasqan, boıynda ulttyq ıdeıa­sy bar azamattar úshin asa qundy.

Mereıtoılyq is-shara barysyn­da shetelderden alynǵan ar­hıv qu­jattarynyń kóshirmelerinen daıar­lanǵan «Jaýhar jádigerler» kórmesi men arhıvtiń 100 jyldyq mereıto­ıyna oraı jaryqqa shyqqan ǵylymı jınaqtar tanystyryldy.

ALMATY