Dańqty balýan Dáýlet Turlyhanovtyń júldesi úshin uıymdastyrylǵan jarysta Úrjar, Aıagóz, Jarma, Tarbaǵataı jáne Kókpekti aýdandarynan, О́skemen men Semeı qalalarynan kelgen jas sportshylar baqtaryn synady.
Is-sharaǵa aýdan basshylyǵy, oblystyq Grek-rım, erkin kúres jáne áıelder kúresi federasııasynyń tóraǵasy Marat Muzaparov, bokstan el quramasynyń bas jattyqtyrýshysy Qaırat Sátjanov, grek-rım kúresinen KSRO sport sheberi, Qazaqstan Respýblıkasynyń eńbek sińirgen jattyqtyrýshysy Qaıyrtaı Orazalınov qurmetti qonaqtar qatarynda qatysty. Aýdan sportynyń ardagerleri de jarystyń tórinen tabyldy.
Jarystyń resmı ashylý saltanatynda quttyqtaý sóz sóılegen aýdan ákimi Radjan Seıtqanov jas urpaqty salamatty ómir saltyn ustanýǵa shaqyryp, sportqa baýlıtyn is-sharalardyń mańyzdy ekenin erekshe atap ótti.
Balǵyn balýandardyń eki kúnge sozylǵan boz kilemdegi beldesýleri tartysty ótti. Árqaısysy namysty qoldan bermeýge tyrysty, bar kúsh-jigerlerin saldy. Ashyq birinshilik bolǵandyqtan, bul saıysta 180 sportshy 11 salmaq dárejesi boıynsha ózara synǵa tústi. Nátıjesinde, 44 balýan júldeger atanyp, olarǵa arnaıy daıyndalǵan medal men madaqtama qaǵazdary, chempıondyq belbeýler men ulttyq quramanyń kúres formalary tapsyryldy.
Aýdanda alǵash ret ótkizilgen oblys deńgeıindegi jarystyń uıymdastyrylýyna kórermender de rızashylyqtaryn bildirdi.
– Semeı qalasy quramasynyń aǵa jattyqtyrýshysy retinde týrnırge 40-tan astam jas balýan alyp keldik. Kókpekti aýdanynda elimizdiń maqtanyshy, jastardyń boı túzeıtin temirqazyǵy Dáýlet Turlyhanov esimi ulyqtalyp jatqany qýantady. Qajymuqan Muńaıtpasov, Jaqsylyq Úshkempirov, Dáýlet Turlyhanovtaı balýandardyń esimderin qulaǵyna quıyp alǵan urpaq eljandy bolyp ósedi, – deıdi Qazaqstan Respýblıkasynyń eńbek sińirgen jattyqtyrýshysy Qaıyrtaı Orazalınov.
Jarys sońynda baıraqty básekeni joǵary deńgeıde uıymdastyrǵan Aslan Balabekuly oblystyq grek-rım, erkin kúres jáne áıelder kúresi federasııasy tóraǵasynyń Alǵys hatymen marapattaldy.
Shyǵys Qazaqstan oblysy,
Kókpekti aýdany
