Jambyl oblysyn uzaq basqarǵan Bóribaı Jeksembın qyzmetinen ketken kezde ornyn (2009 jyldyń qarashasy) Qanat Bozymbaev almastyrdy. Jańa kelgen ákimdi maqtaǵandar da, dattaǵandar da az bolǵan joq. Alǵashqylary tanymaı jatyp tabynatyndar ǵoı. «Salmaqty eken, kóp is tyndyrady» dep á degennen jalaýlata maqtaı jónelse, keıingileri «ashýy burq-burq, sózi dúńk-dúńk» eken dep jaqtyrmaǵan keıip tanytty. Endi bireýler «qazaq tiline shorqaq» degendi alǵa tartyp jatty.
Bir kúni Qanat Bozymbaev oblys zııalylarymen kezdesedi. Sol basqosýda belgili qalamgerlerdiń biri: «Siz ońtústik óńirge keldińiz. Qazaqylyqtyń qaımaǵy buzylmaǵan jaqqa at basyn burǵan soń qazaqsha sóıleýge tıissiz!», deıdi. Synǵa sol jerde lezde ún qatqan jańa ákim esh oılanbastan: «Men sizdermen alty aıdan keıin qazaqsha aıtysatyn bolamyn», dep jaýap beredi. Ýaqyt óte kele Bozymbaev jınalystardy qazaqsha ótkizip, qazaq tilin bir kisideı meńgerip aldy. Bir sózben aıtqanda sózinde turdy.
Qanat Bozymbaev uzyn-sonar jınalystardan aýlaq júrdi. Bar máseleni qysqa-nusqa sheshýge tyrysty, sózge emes, iske beıimdigin kórsetti. Jıyrma jyldaı ýaqyt sóz bolǵan, biraq eshbir ákim kóshire almaǵan qalanyń qaq ortasyndaǵy ortalyq bazardy kóshirdi. Árıne, múddeli toptyń adamdary mıtıng uıymdastyrdy, daý shyǵardy, ýltımatým qoıdy. Biraq, olardyń bárin sabyrǵa shaqyryp, shahardyń ortalyǵynda hattalyp jatqan tarıhtyń arshylýyna alǵash úles qosty.
Uzaq ýaqyt áńgimesi bitpeı kele jatqan ortalyq meshit mańyndaǵy medrese qurylysyn aıaqtaýǵa sóz berdi. Sóz berip ózgeretinder az emes. Biraq, Bozymbaev sózinde turyp, aıtqanyn oryndady. Bir jınalysta «Elde ár jyldyń ataýy bolady. Biz osy jyldy «oblystaǵy jol jyly» dep ataıyq», dedi Bozymbaev. Sóıtti de kóne shahardyń toz-tozy shyqqan talaı kósheleriniń shuryq-tesik jolyn qalpyna keltirdi. Keı ákimder sııaqty avtobýsqa minip sýretke túsken joq, shaıtanarba aıdamady. Úndemeı júrip úlken ister bitirdi.
Zamanaýı sport kesheni Tarazda múlde joq bolatyn. Ákim muny da der ýaqytynda baıqady. Sóıtti de halyqaralyq standartqa saı keletin «Taraz Arena» sport kesheniniń boı kóterýine kúsh saldy. Sol kezde oblystyń sport salasynda júrgender: «Taraz Arenanyń qurylysy bitpeı, Bozymbaev ketip qalmasa eken» degenin talaı esittik. Bir sózben aıtsaq, Bozymbaevtyń tusynda kóptegen aýrýhana salyndy, áleýmettik nysandar boı kóterdi. Áıteýir, uıqyǵa ketken Áýlıeata jeri qaıta oıanǵandaı boldy.
Qanat Bozymbaevtyń tusynda Jambyl sportynyń rýhy kóterildi. Qazaq kúresinen «Eýrazııa barysy» týrnıriniń de negizin Bozymbaev qalady. Odan bólek Olımpıada oıyndarynan tys qalǵaly turǵan erkin kúres sheberi Aqjúrek Tańatarovqa qoldaý kórsetip, Londonǵa barýyna tikeleı yqpal etti.
Medalimniń jartysy - Bozymbaevtiki
«Maǵan Qanat Aldabergenuly qatty kómektesti. Medaldiń jartysy sol kisiniń eńbegi desem, qatelespeımin. Aqıqatyn aıtsam, Leonıd Spırıdonov dodaǵa bir apta qalǵansha salmaq tastap otyrdy. Men salmaq qýyp júrgendikten kórgen joqpyn. Biraq bir kisiler «London Olımpıadasyna bir apta qalǵansha Spırıdonov salmaq qýdy» dep aıtady. Sonda bireýlerdiń oıynda «Aqjúrekti bir kúni bolmasa, bir kúni laqtyryp jiberemiz» degen oı bolǵan ǵoı.
16 kılogramm salmaq qýyp, qan qysymyń kóterilip júrgen kezde senimen birge básekelesiń de salmaq tastap, qasyńdaǵy ústelde tamaqtanyp otyrǵanyn kóresiń. Sodan shydaı almaı kettim de Qanat Aldabergenulyna qońyraý shalyp, jaǵdaıdy aıttym. Ol kisi shaqyrtyp, ákimdikte kútip aldy. Qońyraý shalatyn jerlerge qońyraý shaldy. Abyroıy bar adam ǵoı.
Tutqanyń arǵy jaǵyndaǵy adamdar suraǵan bolýy kerek. Tipti «Ol medal bermeıdi. Qatardaǵy qapshyq» dep te aıtqan shyǵar. Qanat Aldabergenuly: «Aqjúrek, qandaı medal alasyń? Aıtshy, men myna kisilerge aıtamyn qazir», dedi.
«Altyn medal beremin», dedim. Tutqanyń arǵy jaǵyndaǵylar rahattanyp kúldi. Sóıtip altyn alam degenimmen, buıyrǵany qola júlde boldy. Ortalyq alańǵa keshigip keldim. Barmaımyn degenmin. «Ol kisige altyn alam dep ýáde bergem. Aldyna qalaı baramyn. Uıat emes pe?» dedim. Sonda ákimdiktegi kisiler kelip: «Olaı deme, ol kisi shaqyrtyp jatyr. Beldesýlerińniń bárin ózi kórdi. Ádiletsizdik oryn alǵanyn biledi. Júr», dep alyp keldi. Ortalyq alańda turǵan kezde Qanat Aldabergenuly: «Aqjúrek, jaraısyń! Sóz berdiń, ýádeńde turdyń. Boldy. Men saǵan razymyn», dep qolymdy qysty».
Bul – erkin kúresten Olımpıada oıyndarynyń qola júldegeri Aqjúrek Tańatarovtyń sózi. Rasynda Bozymbaevtyń tusynda Jambylda kóp ózgeris boldy. Árıne, jaqsy jaǵynan. Almaty oblysyna ákim bolyp taǵaıyndalǵan Bozymbaev buǵan deıin eki óńirdi basqardy. Tájirıbesi jetkilikti. Erdiń jasy elýden endi asqan ol áli shaý tarta qoıǵan joq qoı. Jańa ıdeıalarymen Jetisý jurtyn qýanta jatar...
