Bul týraly oblystyq sottyń baspasóz qyzmeti málim etti.
Sot mektep dırektory qyzmetin atqarǵan M-nyń 2019 jyldyń qazany men osy jyldyń qańtar aıy aralyǵynda qyzmetine baılanysty senip tapsyrylǵan 1 955 300 teńge kólemindegi bıýdjet qarajatyn jymqyrǵanyn anyqtady.
«Mektep dırektory óz kinásin moıyndaǵan joq. Sot otyrysy kezinde prokýror oǵan eki jyl bas bostandyǵynan aıyrý jazasyn taǵaıyndaýdy usyndy», dep habarlady sottyń baspasóz qyzmeti.
Úkim shyǵarý kezinde sot aıyptalýshynyń jaýapkershiligi men jazasyn jeńildetetin mán-jaılardy, alǵash ret sottalyp jatqanyn, sondaı-aq otbasylyq-materıaldyq jaǵdaıy men oń minezdemesin nazarǵa aldy.
«Sot aıyptalýshynyń memlekettik qyzmet pen memlekettik basqarý múddelerine qarsy aýyr sybaılas qylmys jasaǵanyn moıyndamaıtynyn jáne jasaǵan isine ókinbeıtinin eskerip, keltirilgen zalaldyń 10 eselengen mólsherinde aıyppul salý túrindegi jaza taǵaıyndady. Sondaı-aq budan bulaı ol memlekettik qyzmet atqarý quqyǵynan ómir boıyna aıyryldy. Aıyptalýshy memleket esebine 19 553 000 teńge aıyppul tóleıdi», delingen habarlamada.
Úkim áli zańdy kúshine engen joq.
