Resmı málimetke sáıkes, 16 jeltoqsannan bastap Airbus A320 jolaýshylar ushaǵy aptasyna úsh ret – seısenbi, beısenbi jáne senbi kúnderi Delıge ushatyn bolady.
«Reıs Almatydan tańǵy saǵat 07:50-de shyǵyp, Delıge 11.10-de ushyp barady. Al Delıden beri qaraı shyǵý ýaqyty - 12:20, Almatyǵa saǵat 16:40-ta keledi. Bir jaqqa ushý ýaqyty 3 saǵat 50 mınýt», delingen resmı habarlamada.
Delıge ushatyn barlyq jolaýshy, sonyń ishinde balalar da, www.newdelhiairport.in saıtynda tıisti formany toltyrýy qajet. Al 5 jastan asqan jolaýshylar kelýge deıin 72 saǵat buryn koronavırýsqa jasalǵan PTR-test teris nátıjesin tirkep jiberýge tıis.
Ushaqqa qonardyń aldynda jáne odan túskende árbir jolaýshynyń dene qyzýy ólshenedi. Eger koronavırýstyq ınfeksııanyń belgileri anyqtalsa, sol eldiń medısınalyq mekemesine oqshaýlap qoıady.
Koronavırýsqa qarsy vaksına almaǵan, sondaı-aq, vaksınalaýdyń tolyq kýrsynan ótpegen týrıster Delıge kelgen boıda PTR-test tapsyryp, úıde jeti kúndik karantınde otyrady. Odan keıin taǵy PTR-test tapsyryp shyǵýy qajet.
