«Nur Otan» partııasynyń Tóraǵasy N.Á.Nazarbaevtyń partııanyń qurylǵanyna 15 jyl tolýyna oraı QUTTYQTAÝY

Qymbatty meniń áriptesterim! Qurmetti qazaqstandyqtar! Barsha nurotandyqtar men «Nur Otan» partııasy jaq­taý­shylaryn onyń qurylýynyń 15 jyldyǵymen shyn júrekten quttyqtaımyn! Bul – kezekti tarıhı meje ǵana emes, Táýelsiz Qazaqstan jylnamasynyń mańyzdy belesi. Bizdiń partııamyz – «Nur Otan» partııasy jaýapty saıası kúsh retinde barlyq qıyndyqtar men synaqtardy halyqpen birge bólisip, árqashan elimiz úshin kúrdeli ári ómirlik mańyzy bar sheshimder qabyldady jáne olardyń oryndalýyna árdaıym qol jetkizip otyrdy. Elimizdiń jetistikteri júz­degen myń partııalastardyń eń­bek­qorlyǵymen, sondaı-aq, bizdiń partııalyq baǵdar­la­malarymyzdy qoldaıtyn, jal­pyulttyq jáne jergilikti saılaýlarda partııa kan­dıdattaryna daý­ys beretin qazaq­­stan­dyqtardyń basym kópshi­liginiń joǵary senimimen tyǵyz baılanysty. Táýelsizdik jyldarynda qo­ǵamymyzdyń barsha qazaq­stan­dyqtardy biriktiretin jáne eldiń baıandy bolashaǵyna berik irgetas qalaıtyn basty qundylyqtary qalyptasty. Olar «Máńgilik El» jalpyulttyq ıdeıasynyń ne­gizine aınalyp, «Nur Otan» par­tııasynyń jańa Saıası doktrınasynda bekitildi. Partııa men onyń barlyq jaqtastarynyń kúsh-jigeri olardy ári qaraı ny­ǵaıtýǵa baǵyttalýǵa tıis. «2050 Strategııasyn» jarııalaı otyryp, Qazaqstan álemniń eń damyǵan 30 eliniń qataryna kirý jolyna qadam basty. Barlyq nurotandyqtardyń basty mindeti – halqymyzdyń birligin bekemdeý, óziniń saıası kóshbasshylyǵyn kúndelikti iste dáleldeý, ekonomıkany, memleketti jáne qoǵam ómi­ri­niń barlyq baǵyttaryn jań­ǵyr­týdyń taǵdyrly úderis­teriniń basynda bolý. Partııa árqashan basqarýdyń tıimdi modeliniń, jańarýǵa daı­yn bolýdyń, utqyrlyqtyń, jan-táni­men berilýdiń úlgisi bolýǵa tıis. Partııa mereıtoıynda men búgin barsha áriptesterime par­tııa­nyń qalyptasýyna, onyń  Otanymyz­dyń órkendeýi jo­lyn­daǵy jumysyna qos­qan úles­teri úshin shynaıy alǵy­sym­dy bildiremin! Barlyq partııa músheleri men barsha qazaqstandyqtarǵa tatýlyq pen baq-bereke já­ne Otanymyz – Qazaqstan Respýb­lı­kasynyń uly bolashaǵy jolynda barlyq ıgi maqsattarǵa qol jetkizýlerin tileımin! Nursultan NAZARBAEV.